Policia e Shtetit ka dhënë informacion zyrtar në lidhje me plagosjen e ndodhur ditën e sotme në zonën e quajtur Prek Cali, të qytetit të Shkodrës.
Autoritetet deklarojnë se kanë identifikuar autorin i cili qëlloi me armë zjarri ndaj 38-vjeçarit Tonin Larushku, nga fshati Toplanë, Vau i Dejës.
Siç raporton gazetari Simon Shkreli për ABC News, mësohet se autori i dyshuar dhe i plagosuri janë shokë me njëri-tjetrin.
Sakaq policia ka njoftuar se është identifikuar autori i mundshëm, Luverdo Kola, 29 vjeç banues në Shkodër.
Mësohet se ngjarja ka ndodhur gjatë një konflikti të çastit, ndërkohë policia vijon kërkimet për kapjen e autorit.
Njoftimi i Policisë
Shkodër-Policia identifikon autorin e plagosjes së ndodhur pak minuta më parë dhe vijon krehja e zonës për kapjen e tij.
Në zonën e quajtur Prek Cali, të qytetit të Shkodrës, shtetasi T.L, 38 vjeç, nga fshati Toplanë, Vau i Dejës, si pasojë e një konflikti të çastit me një person tjetër ka mbetur i plagosur me armë zjarri dhe ndodhet në spital për ndihmë mjekësore
Me marrjen e njoftimit, shërbimet e DVP dhe të Komisariatit të Policisë Shkodër kanë shkuar menjëherë në vendngjarje dhe falë veprimeve të shpejta profesionale kanë bërë të mundur identifikimin e autorit të dyshuar, shtetasin L.K, 29 vjeç banues në Shkodër.
Shërbimet e Policisë në bashkëpunim me FNSH kanë rrethuar zonën dhe vijon krehja e saj për kapjen e autorit.
Në atë zonë është kapur dhe shoqëruar një person që dyshohet se ka dijeni për ngjarjen .
Grupi hetimor nën drejtimin e Prokurorisë së Rrethit Gjyqësor Shkodër po vijon punën për zbardhjen e rrethanave të ngjarjes dhe sigurimin e çdo prove materiale në vendngjarje që do ti shërbejë hetimit dhe dokumentimit të plotë ligjor të ngjarjes./abcnews.al
