Loading ...
Policia ka zbardhur detaje të reja lidhur me ngjarjen e ndodhur mbrëmjen e së dielës në det, përballë Palasës, ku u raportua për të shtëna të dyshuara me armë zjarri në ajër nga një jaht.
Policia kufitare dhe forca të njësisë policore Delta arritën të ndalojnë mjetin lundrues pas gati 2 orësh operacion në det që nga marrja e njoftimit dhe e shoqëruan atë në Porto Palermo për kontrolle të mëtejshme.
Ndërsa 4 persona që ndodheshin në bord u ndaluan nga policia. Dy nga personat që ndodheshin në bordin e jahtit, tentuan të afroheshin në breg me gomone. Por, pasi konstatuan se edhe aty kishte efektivë policie, u kthyen sërish drejt jahtit.
Sipas të njëjtave burime, në përpjekje për t’iu shmangur ndjekjes nga policia, jahti fiku dritat dhe vijoi lëvizjen në det derisa u arrit nga policia.
Policia dhe grupi hetimor po hetojnë mbi arsyet pse kanë ndodhur të shtënat me armë nga jahti, ndërsa gjatë kontrollit të personave dhe në bordin e tij nuk u gjet asnjë send apo mjet i kundërligjshëm.
