Nga Erblina Mile
Emigrantët shqiptarë kanë sjellë pranë familjeve mbi 340 milionë euro në 6 muajt e parë të këtij viti. Të dhënat e Bankës së Shqipërisë tregojnë se nëse e krahasojmë me të njëjtën periudhë të një viti më parë vërehet se remitancat janë shtuar me 67 milionë euro.
Kjo shpjegohet me faktin se viti i kaluar ka qenë një vit i vështirë financiar për shkak të pandemisë dhe në shumë shtete ka pasur kufizime të forta. Ndërkohë që rritja e parave të sjella nga emigrantët gjatë këtij viti lidhet kryesisht me shpenzimet e larta shëndetësore të shqiptarëve për shkak të Covid.
Gjatë periudhës prill-qershor të ardhurat e emigrantëve janë rritur me rreth 42 % nëse e krahasojmë me të njëjtën periudhë të një viti më parë. Por nëse bëjmë një vlerësim të parave që emigrantët kanë sjellë pranë familjarëve në Shqipëri, konstatohet se është më e larta në 10 vitet e fundit.
Sipas të dhënave të mëparshme të Bankës së Shqipërisë, 1 në 4 familje shqiptare kanë burim të vetëm jetese paratë që u sjellin familjarët që punojnë në emigrim. Ndërkohë që 69% e të ardhurave nga emigracioni shkon për përballimin si dhe shpenzimet e tjera në banesë si ujë dhe energji elektrike. /abcnews.al/
