Ndriçim Shtubina kaloi sezonin e fundit te Vllaznia, skuadër me të cilën shënoi dy gola. Sulmuesi 33-vjeçar, i cili mund të aktivizohet edhe në shumë pozicione të tjera, është larguar nga Shkodra dhe ka zgjedhur të vazhdojë karrierën tek Egnatia në Kategorinë e Parë.
Klubi nga Rrogozhina pretendon kalimin në Superiore dhe po lëviz mirë në merkato. Shtubina ka njoftuar kalimin tek ekipi i ri nëpërmjet një statusi në “Facebook”, aty ku shpreh shumë falënderime dhe nuk i mungon ironia ndaj drejtuesve të rinj të klubit shkodran.
“Nga sot jam lojtar i FK Egnatia, falënderoj profesor Maganin dhe presidentin e klubit bashkë me stafin që besuan tek aftësitë e mia. Shpresoj qe të arrijmë objektivat drejt Kategorisë Superiore. Falënderoj Kryetaren e Bashkisë Voltana Ademi dhe Administratorin e Vllaznisë Suad Lici. Falënderoj edhe tifozët e Vllaznisë për mbështetjen.
Të paktën për kaq vite që kam në futboll edhe ne Shkodër, për këto dy ngjyra, meritoj dhe vetëm pak respekt nga këta drejtuesit e rinj, sepse nuk kam asnjë kontakt nga këta. Gjithsesi Vllazninë e du, asht në zemrën teme gjithmonë. Shpresoj që Vllaznia te shkojë sa më lart”, përfundon Shtubina. /abcnews.al
