Egbo: Ngoo kapitull i mbyllur, i kam sulmuesit! Objektivat e Tiranës dihen

schedule18:26 - 31 Tetor, 2020

schedule 18:26 - 31 Tetor, 2020

Nesër nis sezoni i ri i futbollit shqiptar me raundin e parë të Kupës së Shqipërisë. Tirana pret Shkumbinin, takim që do të luhet në orën 13:30 në kompleksin “Skënder Halili”. Trajneri i kampionëve, Emmanuel Egbo foli rreth situatës së ekipit të tij në konferencën për shtypin, ndeshjes së nesërme, objektivave, rivalëve për titull dhe tifozëve bardheblu.

SEZONI I RI – “Lajm i mirë fillimi i futbollit, për ne dhe për sportdashësit. Lajmi më i mirë është marrëveshja që ka bërë FSHF me qeverinë, që do ndihmojnë shumë sportin. Jemi në rregull, besoj se edhe ju gazetarët jeni të kënaqur që do të fillojë kampionati”.

SHKUMBINI – “Çdo ekip duhet vlerësuar maksimalisht. Strategjia jonë është e qartë, do të vlerësojmë çdo ekip që kemi përballë, pavarësisht nivelit. Nënvlerësimi është në dëmin tonë, kështu që e kemi vlerësuar maksimalisht Shkumbinin”.

TIRANA – “Besoj se ndeshjet do tregojnë nëse jemi më të fortë se vitin e kaluar apo jo. Nuk e kemi gjithë kontingjentin gati. Kemi tre titullarë të dëmtuar, po rikuperohen. Presim edhe lojtarët e rinj, të cilët duan kohën e vet për t’u ambientuar me skuadrën. Jemi të detyruar t’i presim, shpresoj të ambientohen sa më shpejt me pjesën tjetër të skuadrës”.

 

Bardheblutë gjatë një prej miqësoreve të luajtura…

SULMI – “Ngoo ka ndihmuar skuadrën kur ka qenë, por nuk është tani. E quaj kapitull të mbyllur. Kemi 3 sulmues, por edhe elemente nga akademia që do ndihmojnë ekipin. Besoj se deri diku Tirana ka sulmin e mirë për të mbrojtur kampionatin”.

MUNGESAT – “Nuk mungon vetëm Cale, po e nisim sezonin me tre lojtarë mangët. Jashtë janë edhe Çelhaka dhe Toshevski. Nuk është e lehtë për t’i zëvendësuar, pasi janë lojtarë të afirmuar, sidomos Cale dhe Çelhaka. Ata që do i zëvendësojnë mendojmë se deri diku janë afërsisht me formën e atyre që nuk janë në fushë. Kemi tentuar të provojmë disa lojtarë në pozicionet e Cale, Çelhakës dhe Toshevskit”.

OBJEKTIVAT – “Tirana çdo sezon ndërtohet për të fituar kampionatin dhe Kupën e Shqipërisë. Janë dy objektiva të ekipit këtë sezon, nuk ka ndryshime. Rivali më i fortë? Të dhjetë ekipet e Superiores janë rivalë. Laçi, Partizani, Kukësi, Vllaznia dhe Teuta mendoj. As Apolonia nuk ka ekip të keq. Janë të gjithë ekipe që do të na rivalizojnë në çdo moment”.

TIFOZËT – “Ata janë lojtari i 12-të i skuadrës. Besoj se do e mbështesin ekipin, jashtë apo brenda stadiumeve. Mbështetja e tyre nuk do na mungojë, e dimë këtë gjë. Shpresoj që në një kohë të shkurtër të kthehen në stadium, pasi kemi më shumë forca kur ata na mbështesin nga brenda stadiumit”. /abcnews.al