Kryetarit të PDK-së Memli Krasniqit i është ofruar një ekip i njësisë së mbrojtjes, me rekomandim të Policisë së Kosovës. Kjo pasi ka informacione për kërcënime të mundshme nga grupe terroriste serbe, bëjnë me dije mediat në Kosovë.
Gjithashtu Lidhja Demokratike e Kosovës ka konfirmuar se kryetari i saj Lumir Abdixhiku, është marrë në mbrojtje të policisë.
“Me rekomandim të Drejtorisë së Përgjithshme të Policisë së Kosovës, kryetarit të Partisë Demokratike të Kosovës, Memli Krasniqi, i është ofruar një ekip i njësisë së mbrojtjes së afërt të Policisë”, ka bërë me dije drejtor i Komunikimit në PDK, Valmir Klaiqi.
Nga ana tjetër, Deputeti i LVV-së Enver Dugolli, njëkohësisht anëtar i Komision për Çështjet e Sigurisë dhe Mbrojtjes, tha se duke marr parasysh që një pjesë e madhe e armëve është konfiskuar, rigrupimi i terroristëve nga Serbia vazhdon që të jetë ende kërcenim për Kosovën.
“Rreziku mbetet për shkak se ai formacion një pjesë e tyre e madhe është larguar ka ikur për Serbi. Ndonëse një pjesë të madhe të armatimit është i konfiskuar, por rigrupimi i tyre i dirigjuar nga Serbia vazhdon që të jetë ende kërcenim për Kosovën”, është shprehur ai.
/abcnews.al/
