Nga Juxhin Mustafaraj
Selami Jenishehri e festoi ditëlindjen e tij të 80-të ndryshe nga pensionistët e tjerë. Fati i buzëqeshi të jetë deputet. Por në fund të aventurës së tij politike, konkluzioni për kolegët e tij ishte ky.
“Këta deputetë janë deputetët më të poshtër që ka pasur historia e popullit shqiptar”, ka thënë ai.
Ka bindjen se kjo e mërkurë nuk ishte e fundit për të si deputet.
“Askush nuk e din që Selami Jenishehri kryetar i Partisë së Pensionistëve të Shqipërisë nuk do të jetë pas shtatorit në Kuvendin e Shqipërisë, meqenëse 100% do të përsëriten zgjedhjet”, thotë ai.
Majlinda Halilaj nuk e kishte menduar ndonjëherë se përballja me kamerat në foltoren e Parlamentit do ta emociononte aq shumë sa ky fjalim në tetor të 2019. Megjithatë ajo është e kënaqur për kontributin e dhënë.
“Besoj se kam punuar shumë për tu mbajtur mend”, ka thënë ajo.
Artur Roshi nuk është kompleksuar nga fakti që u quajt tradhtar nga demokratët.
“Unë skam qenë tradhtar asnjë ditë”, është shprehur ai.
Ralf Gjoni është i sinqertë kur pranon se askujt nuk do t’i mungojë ky parlament.
“Nuk i vjen keq askujt që nuk do të jemi më në parlament. Unë do të mbaj fjalën time të fundit sot”, shprehet ai.
Socialisti i Vlorës, Fate Velaj në fund të mandatit të tij në Parlament, projektin e tij politik e sheh në institucionet ndërkombëtare.
“Unë kam qenë gjithmonë në politikë. Kam qenë në politikën Europiane dhe nuk do të thotë se të mos jesh në sallën e parlamentit nuk merr pjesë në politikë”, ka thënë Velaj.
Në këtë mënyrë u përmbyll edhe kjo legjislaturë Parlamentare, e para që pas një procesi zgjedhor u riformatua në vitin 2019, duke sjellë në Parlament 40 ligjvënës të rinj, shumë prej të cilëve marrëdhënien me politikën e nisën ditën që i’u kërkua të marrin një mandat./abcnews.al/
