Trajneri i Kukësit, Shpëtim Duro, ka folur para sfidës ndaj Luftëtarit, që do të luhet nesër në orën 13:00. Kjo është një sfidë që duhet fituar me patjetër dhe këtë gjë e ka pranuar edhe Duro, i cili në fjalën e tij, tha: “Jemi në një situatë jo pozitive, në krizë rezultatesh, ashtu edhe si shumë skuadra që po kalojnë një situatë të tillë. Kemi faktorë që na kanë penalizuar, si dëmtime dhe sëmundje, ashtu siç na ndodhën para Skënderbeut.
“Fitorja me Luftëtarin është detyrim, edhe pse nuk do jetë e lehtë. Ne nuk jemi stabilizuar ende me një fushë tonën, nuk e dimë se ku do të luajmë. Me këtë situatë, do të luajmë në Lushnjë, janë vështirësi që nuk i ka asnjë skuadër tjetër, terren jo pozitiv.
Gjithsesi, është një faktor i pashmangshëm, s’ka justifikim. Kemi një ndeshje jo të lehtë prej këtyre faktorëve, por jam i bindur se skuadra do të reagojë dhe do të fitojë. Kukësi është një skuadër që pretendon për lart dhe normalisht që jemi nën presion. Kjo është diçka logjike, edhe presioni vjen nga këto objektiva, por duhet të dalim nga kjo situatë jo e mirë”, përfundoi Duro./abcnews.al
