Një gjykatë ushtarake ruse ka dënuar një person me akuzën se dëshironte t’i bashkohej ushtrisë ukrainase për të luftuar kundër Kremlinit me 10 vjet burg për “tradhti dhe terrorizëm”, njoftoi sot agjencia e lajmeve TASS.
Në një deklaratë, shërbimi rus i sigurisë (FSB) thekson se burri, 26 vjeç, i cili jeton në Buryatia (Siberi), po përgatitej t’i bashkohej forcave ukrainase.
Sipas këtij burimi, ai kishte qenë në kontakt që në pranverën e vitit 2023 me një banor të Ukrainës dhe kishte blerë pajisje ushtarake, një helmetë, jelek antiplumb, uniformë dhe një flamur ukrainas.
Ai u arrestua ndërsa po udhëtonte për në Ukrainë, ku, sipas FSB-së, donte të bashkohej me “Legjionin për Lirinë e Rusisë”, një organizatë që ai thotë se përbëhet nga luftëtarë rusë që kundërshtojnë Kremlinin.
Burri, emri i të cilit nuk bëhet i ditur, do të duhet të vuajë tre vitet e para të dënimit në një burg të rregullt dhe më pas do të transferohet në një koloni penale të “regjimit të rreptë”.
Shërbimet ruse të sigurisë kanë arrestuar shpesh njerëz në Rusi që akuzohen për bashkëpunim me Ukrainën.
/abcnews.al
