Policia e Tiranës, ka arrestuar një 39-vjeçar për protestën e dhunshme të së premtes para bashkisë së Tiranës.
Në pranga ka rënë Bledar Krasniqi, banues në Tiranë, për veprat penale “Prishja e qetësisë publike”, “Goditjet për shkak të detyrës”, “Shkatërrimi i pronës me zjarr”, “Shkelja e rregullave mbi lëndët plasëse dhe djegëse”, dhe “Kundërshtimi i punonjësit të policisë së rendit publik”.
Ndërkohë policia ka proceduar penalisht edhe 6 mbështetës të tjerë të Rithemelimit dhe të Partisë së Lirisë, për veprat penale “Prishja e qetësisë publike”, “Shkatërrimi i pronës”, dhe “Mosbindja ndaj urdhrit të punonjësit të policisë së rendit publik” informoi sot policia e Tiranës.
Siç shihet nga këto pamje të siguruara nga ABC News, Bledar Krasniqi ka qenë I maskuar, ndërsa disa simpatizantë të opozitës e mbulojnë me flamujt e Partisë Demokratike për të mos u identifikuar teksa hedh shishet me molotov. Përveç shisheve me molotov, Bledar Krasniqi është personi që u vuri edhe flakën gomave përpara bashkisë.
Pavarësisht numrit të pakët në protestën e opozitës, simpatizantët e Berishës dhe të Metës, vijuan me skenarët e dhunës të premten, duke rrezikuar në disa raste seriozisht jetën e punonjësve të policisë. Kjo ishte protesta e 12 që mbahet para bashkisë, ndërsa si në protestat e mëparshme thirrjet ishin për lirimin e Sali Berishës, i cili mbahet në arrest shtëpie me urdhër të Gjykatës së Posaçme.
/abcnews.al/
