Loading ...
“E dija se diçka nuk shkonte, por nuk guxoja ta thosha me zë”. Kështu nis rrëfimin e saj prekës Teuta Kurti, nëna e vogëlushit Dard Hoxha, e cila prej më shumë se tre vitesh e gjysmë po përballet me një nga sfidat më të mëdha të jetës së saj: kujdesin dhe betejën për djalin e saj, i diagnostikuar me një mutacion gjenetik tepër të rrallë. Historia e Teutës është historia e një nëne që nuk reshti kurrë së kërkuari përgjigje, edhe kur mjekësia nuk arrinte t’i jepte një diagnozë të qartë.
Gjithçka nisi që gjatë shtatzënisë. Në muajin e shtatë, mjekët dyshuan se njëra anë e zemrës së foshnjës nuk ishte zhvilluar njësoj si tjetra. Megjithatë, Teuta kishte kohë që ndiente se diçka ishte ndryshe.
“I thosha motrës se nuk po e përjetoja këtë shtatzëni si të parën. Nuk e thosha me zë, por ditët po i shijoja ndryshe”, rrëfen ajo.
Pas lindjes, frika e saj mori formë. Natën e parë, Dardi nuk iu soll në gji. Kalonin ditët dhe mjekët flisnin për kontrolle rutinë, ndërsa nëna e re e kuptonte se situata ishte më e rëndë.
“Shkova në shtëpi me krahët bosh. Prisja ta kisha djalin pranë meje, por ai mbeti në spital. Nuk doja të flisja me askënd. Fajin e kërkoja tek vetja, mendoja mos kisha bërë diçka gabim gjatë shtatzënisë apo lindjes”, tregon Teuta.
Për javë të tëra, familja jetoi mes pasigurisë dhe mungesës së përgjigjeve. Çdo ditë shkonin në spital për t’i çuar qumësht, por ende nuk dinin çfarë po ndodhte me vogëlushin.
Kur Dardi u kthye në shtëpi, Teuta vazhdoi të vinte re se ai ishte ndryshe nga fëmijët e tjerë.
“Ai ndryshonte që nga mënyra si reagonte ndaj prekjes, tek forma e kokës, trupit dhe shtylla kurrizore. E ndjeja se diçka nuk ishte si tek fëmijët e tjerë”, rrëfen ajo.
Pasi në Shqipëri nuk po arrinin të gjenin një diagnozë, Teuta dhe bashkëshorti vendosën të niseshin drejt Italisë. Për dy muaj e gjysmë qëndruan në Pediatrinë e Romës, duke kryer analiza të shumta gjenetike.
Më në fund, erdhi përgjigjja: Dardi vuante nga mutacioni gjenetik “PIEZO2”, një çrregullim tepër i rrallë, i diagnostikuar vetëm tek një numër shumë i vogël njerëzish në botë.
Përveç problemeve në frymëmarrje, ushqyerje dhe qëndrim, me kalimin e kohës Dardit iu shfaq edhe skolioza. Megjithatë, familja nuk u dorëzua asnjëherë.
“Disi ia kemi dalë. Sot ai ka përmirësime dhe ndihemi krenarë për çdo hap që bën”, shprehet Teuta.
Përtej sfidave, historia e Teutës është edhe një histori e madhe dashurie. Ajo dhe bashkëshorti i saj u njohën përmes të afërmve, në një kohë kur të dy po përfundonin studimet. Pavarësisht periudhave në distancë, ata ndërtuan një familje të bukur dhe u bekuan fillimisht me vajzën e tyre, Diorën. “Diora na tregoi një dimension tjetër të dashurisë, një dashuri që nuk e kishim njohur më parë”, thotë Teuta./abcnews.al
