Për shumë vite me radhë ka qenë i lartë numri i kosovarëve që kanë udhëtuar drejt Vlorës për të festuar Ditën e Pavarësisë. Këtë herë në doganën e Morinës u regjistruan më pak shtetas kosovarë drejt Shqipërisë, por më shumë shtetas të Shqipërisë drejt Kosovës.
Në Morinë ndryshe nga vitet e tjera këtë 28 Nëntor pati më pak lëvizje drejt Shqipërisë. Ishte i vogël numri i atyre qytetarëve të Kosovës që preferuan të udhëtojnë drejt Vlorës për të festuar Ditën e Pavarësisë.
“Po shkoj në Vlorë për ditën e flamurit, urime gjithë shqiptarëve për ditën e flamurit”.
Më të shumtë ishin qytetarët nga Shqipëria që udhëtuan drejt Prizrenit e Prishtinës. Një pjesë e tyre të organizuar për festë.
“Ne jemi nis për në Prizren e Prishtinë me rastin e festave”.
Por shqetësimi i qytetarëve mbeten radhët në kufi. Reagimi vjen i shoqëruar edhe me boritë e automjeteve.
“Këtu ka vonesa për çdo ditë, jo vetëm për sot”.
Gjithsesi, në pikën e kalimit kufitar kujdesi për dekorin, vendosjen e flamujve kombëtare në çdo cep të doganës nuk ka munguar. /abcnews.al
Gazetar i ABC News, Kukës: Bujar Muçmata
