Dita Botërore e Ujit, Meta: Inkurajoj shqiptarët të solidarizohen me kauzën e shpalljes së Vjosës Park Kombëtar

Presidenti i Republikës Ilir Meta me rastin e Ditës Botërore të Ujit u ka bërë thirrje shqiptarëve që të  solidarizohen me kauzën e shpalljes së Vjosës Park Kombëtar.

Në një postim në Facebook, Meta shkruan se është përgjegjësi e jona që ta mbrojmë Vjosën, si një trashëgimi të vyer natyrore kombëtare dhe europiane nga çdo projekt që ai i cilësoi si shkatërrimtarë dhe abuzues.

Vjosa ka një rëndësi mbarë europiane, shprehet kreu i shtetit, ndaj ai duke risjellë në vëmendje edhe rezolutën e Parlamentit Europian për shpalljen e saj Park Kombëtar, nxit autoritetet e larta të BE “të përkrahin fuqimisht kauzën, që na përket të gjithëve.”

POSTIMI NË FACEBOOK

Thellësisht mirënjohës për kontributin e jashtëzakonshëm të aktivistëve mjedisorë, shkencëtarëve dhe akademikëve vendas e të huaj, që i kanë dhënë forcë zërit të komunitetit duke shfaqur në Tiranë , por edhe në kryeqytetet më të rëndësishme të Europës , në Bruksel , Berlin dhe Paris thirrjen që buçet nga lumi: VJOSA PARK KOMBËTAR TANI!

E DUAM VJOSËN DHE DO TA MBROJMË!