Zëdhënësi i Bashkimit Evropian për Çështje të Jashtme dhe Siguri, Peter Stano, ka konfirmuar se i dërguari i posaçëm i bllokut evropian për dialogun mes Kosovës dhe Serbisë, Mirosllav Lajçak, do të jetë në Berlin më 4 maj, ku do të takohet edhe me kryeministrin e Kosovës, Albin Kurti dhe presidentin e Serbisë, Aleksander Vuçiç.
Paralajmërimet janë se Lajçak do të ketë takim të përbashkët me të dy këta liderë.
Nëse realizohet, ky do të jetë takimi i parë mes Kurtit dhe Vuçiçit, prej vitit të kaluar.
“Kancelari gjerman, Olaf Scholz e ka ftuar presidentin Vuçiç dhe kryeministrin Kurti në vizita të posaçme bilaterale në Berlin më 4 maj. Me ftesë të kancelarit Scholz edhe i dërguari i posaçëm, Mirosllav Lajçak, do të jetë në Berlin më 4 maj për t’u takuar së pari me kancelarin e pastaj edhe në një takim joformal me presidentin Vuçiç dhe kryeministrin Kurti”, ka thënë zëdhënësi i BE-së.
Në BE ka pasur përpjekje për të krijuar kushte që të ketë takim të nivelit të lartë në kuadër të dialogut mes Kosovës dhe Serbisë, por deri më tani pa sukses.
Vetë kryediplomati i BE-së, Josep Borrell ka thënë se nuk do të ftojë liderët në një takim të tillë sa për sy e faqe, pa pasur indikacione të qarta se në takime të tilla do të arrihet përparim konkret.
Ky takim joformal në Berlin, nëse realizohet, mund të jetë një mundësi për të përmirësuar atmosferën në kuadër të dialogut dhe për ta bërë të mundur edhe ndonjë takim të nivelit të lartë në Bruksel.
Takimet e para që ishin zhvilluar me Kurtit dhe Vuçiçit në Bruksel, një zyrtar i BE-së i ka quajtur si “takime jo të lehta, jo të këndshme dhe jo me përmbajtje”.
Ky zyrtar kishte thënë se ato takime kanë qenë më shumë “monologje të këtyre liderëve” sesa dialog të vërtetë.
Lajçak ka paralajmëruar se më datën 13 maj do të presë në një takim të radhës kryenegociatorët e Kosovës dhe Serbisë në kuadër të dialogut.
Pritet që në këtë takim të vazhdojnë diskutimet për çështjen e targave të veturave, për të cilat palët nuk janë marrë vesh në takimin e fundit në Bruksel.
Marrëveshja e përkohshme mes dy shteteve për targat parasheh mbulimin me letra ngjitëse të simboleve shtetërore në targat e makinave kur ato të kalojnë në territorin e njëra-tjetrës.
Kjo marrëveshje, e arritur më 30 shtator të vitit të kaluar në Bruksel, ka dalë pas disa ditësh trazira në veri të Kosovës, ku disa serbë lokalë kanë bllokuar rrugë, për të kundërshtuar vendimin e atëhershëm të Qeverisë së Kosovës për masa reciprociteti.
Me ato masa, makinat me targa të Serbisë, me të hyrë në territorin e Kosovës, është dashur të vendosin targa të përkohshme – ngjashëm siç kanë vepruar shoferët e makinave me targa të Kosovës kur kanë hyrë në Serbi./REL
