E pamundur të shmangen në lojën më të bukur në botë. Futbolli nuk është vetëm sport, por edhe garë dhe dëshirë për fitore, e çdo moment I diskutueshëm shkakton përplasje të forta.
Ndodhi sërish kështu, këtë herë në derbin e Madridit, Real-Atletiko në “Santiago Bernabeu”, dhe alarmin e dhanë “merengesit”.
Të mbiquajturit “mbretërit e futbollit”, akuzuan arbitrin dhe VAR-in për penalltinë që I dha mundësi Atletikos të kalonte në avantazh.
Pati apo nuk pati shkelje në zonë?
Arbitri dhe VAR-i thanë “po”, dhe Hulian Alvarez realizoi me penallti për 1-0.
Menjëherë pas ndeshjes doli në dritë biseda me zë e arbitrit dhe sallës së VAR-it, dhe kjo u duk si provokim për Realin, që kishte kërkuar pa sukses audion e bisedës VAR në kontaktin mes Mbapesë dhe Romeros në një ndeshje të kaluar.
Në televizionin e Realit pati akuza të rënda për arbitrat dhe drejtuesit e La Ligës, duke e quajtur një sistem kundër klubit të tyre.
Pas pushimit, barazimin e rivendosi shpejt Kilian Mbape, tepër në formë kohët e fundit, por fitorja nuk u arrit.
Heroi ishte portieri I Atletikos, Oblak, me pritje të mëdha.
Trajneri I bardhekuqve, Simeone, krijoi gjithashtu paksa polemike kur tha në konferencën për shtyp se skuadra më e mirë e kampionatit është Barcelona.
Për këtë u ngacmua trajneri I Realit, Karlo Anceloti, që u përgjigj se “gjithsecili është I lirë të ketë mendimin e tij”.
Gazeta e kryeqytetit ,“Marka”, komenton në mënyrë asnjanëse: Një pikë dhe vazhdojmë! Barazim drithërues në derbin që e la La Ligën më të barabartë se kurrë!”
“Një derbi pa pronar, – komenton e përditshmja tjetër madrilene, “AS”, – Madridi dhe Atletiko ndanë dominimin dhe pikët!”
Reali kryeson kampionatin me 50 pikë ndaj 49 të Atletikos, ndërsa Barcelona ka 45 pikë, por me një ndeshje më pak.
