Kryeministri Edi Rama në fjalën e tij në konferencën “Deputeti që Duam”, u shpreh se të gjithë ata që duan të bashkohen dhe kanë ambicie, të aplikojnë.
“Në skuadrën tonë vlerë të shtuar nuk të bën mosha, apo fakti që mund kesh qenë më parë në rrethin më të gjerë që ka PS. Nuk të bën as lidhja apo lidhjet që mund të kesh me PS. Të gjitha këto janë të pamjaftueshme. Vlerë të shtuar të bën çfarë ti je në gjendje të demonstrosh. Duke treguar që kandidat apo kandidate që i duhesh PS dhe këtë ta demonstrosh çdo ditë”, tha Rama.
Gjithashtu kryeministri theksoi se është shumë i rëndësishme promovimi i kandidaturës nga të gjithë personat që duan të jenë pjesë familjes politike të PS.
“Kjo platformë është për të gjithë ata që përndryshe nuk u vjen radha. Politika është si jeta dhe jeta kudo, së paku në pellgun e Mesdheut është e njëjtë me ndryshime relative dhe të gjitha ndikojnë. Aq më tepër ku Shqipëria është vend i vogël, ku të gjithë i njohim të gjithë. Duhet që ky rrjet lidhjesh dhe njohjesh të jetë edhe më i madh që të çojë ujë në mullirin e PS”.
