Loading ...
Mbrëmjen e sotme qarkulloi në media një foto ku duken në një lokal deputeti i PD-së, Arbi Agalliu me kryeministrin Edi Rama. I kontaktuar nga Abcnews.al deputeti demokrat sqaroi se kjo ka ndodhur dy muaj më parë në Vlorë, por theksoi se nuk ishte takim, por “një përshëndetje siç këmbehen 2 njerëz në të njëjtin mjedis” dhe shtoi se me Edi Ramën nuk ka bërë kurrë asnjë pazar.
“Nuk ka asgjë më shumë sesa duket në foton e nxjerrë si sensacion nga specialistët e manipulimit dhe të dhunës verbale e fizike. Është një përshëndetje 2 muaj më parë (13 nëntor), siç këmbehen 2 njerëz në të njëjtin mjedis dhe kaq!
Në kulturën dhe formimin tim nuk kam asnjë kompleks të përshëndes këdo. Në jetën time profesionale kam takuar dhe do takoj pafund njerëz me bindje të ndryshme politike, me pozicione të ndryshme e statuse të ndryshme. I besoj sjelljes qytetare dhe profesionale!
Me Edi Ramën nuk kam bërë kurrë asnjë pazar, asnjë marrëveshje, asnjë cënim të interesit publik!
Nga një anë më vjen keq që bëjnë qimen tra. Nga ana tjetër, më vjen mirë që kanë kaq shumë interes për aktivitetin tim politik dhe privat.
Të tilla lajme të sajuara keq i konsideroj si përpjekje shumë idiote për shantazh! Le të vazhdojnë! Unë kam zgjedhur të punoj për një të ardhme më të mirë për Partinë Demokratike dhe për vendin” deklaroi ai.
Referuar zhvillimeve të forta brenda PD-së, fotoja pritet që të sjellë reagime nga grupi i Berishës që e akuzon Lulzim Bashën për bashkëqeverisje me Edi Ramën./ Abcnews.al
