MANËZ- Gazetarja e kronikës, Etleva Delia, ka zbardhur detaje të reja në lidhje me aksionin e Policisë, RENEA në kampin e muxhahedinëve në Manëz të Durrësit. Ajo thotë se kontrolli është bërë konfirm të gjitha rregullave, por vetë muxhahedinët nuk e kanë pritur mirë këtë “mësymje” dhe më pas janë përplasur me Policinë.
“Nga të gjitha të dhënat që kemi siguruar kontrolli është bërë konform të gjitha rregullave. Është një vendim që është marrë ditën e djeshme dhe ka shkuar sot për tu ekzekutuar nga policia, kanë qenë dy prokurorë që kanë kërkuar këtë bashkë me RENEA dhe është bërë konform rregullave, por është hasur në rezistencë të muxhahedinëve”, tha ajo.
Në studion e ABC News, Delia tha se SPAK dyshohet se ka pasur informacione për sulme kibernetike, që muxhahedinët kanë kryer ndaj shteteve të tjera. Kjo shtoi ajo është në kundërshtim dhe në shkelje të marrëveshjes, me të cilën janë pranuar të vijnë në Shqipëri.
“Hetimet që po kryheshin nga SPAK, kanë pasur informacion në lidhje me sulme kibernetike që ata mund të kenë kryer ndaj shteteve të tjera. Kjo është në shkelje të marrëveshjeve që shteti shqiptar ka më muxhahedinët, që janë strehuar për qëllime humanitarr. Në marrëveshje është qartësisht e thënë dhe e nënshkruar që nuk ka asnjë sulm për vendet e tjera, Iranin jo e jo, as Shqipërinë dhe as vendet e tjera dhe kjo është arsyeja pse është kryer një kontroll i tillë. Kontrolle edhe për persona që mund të kenë qenë anëtarë të MEK, por mund të kenë devijuar gjatë rrugës”, tha ajo.
Referuar burimeve, gazetarja tha se në aksion janë sekuestruar kompjuterë të teknologjisë së lartë, për të cilët duhet kohë që të kontrollohen se çfarë informacionesh ka brenda tyre.
“Aty nuk ka vetëm kompjuterë dhe laptopë të thjeshtë, janë kompjuterë të teknologjisë së lartë, që duhen kohë që të hapen dhe të shihen se çfarë kanë brenda. Kjo mbase ka qenë arsye se pse ata nuk e kanë pritur mirë aksionin e policisë. Janë shumë të zhvilluar në teknologji dhe SPAK do të provojë nëse janë përdorur këto mjete për sulme të tilla. Ata s’kanë pse ta kundërshtojnë këtë kontroll, që nga ky moment fillojnë dyshime se përse duhet të kundërshtohej”, tha ajo.
Në lidhje me pretendimet e muxhahedinëve se një anëtar i tyre ka humbur jetën nga përplasja me policinë shqiptare , gazetarja tha se për këtë duhet të pritet ekspertiza mjeko-ligjore, e cila do t’i japë përgjigje pretendimeve. Gjithsesi Ministria e Brendshme në reagimin publik e ka mohuar të ketë viktima si pasojë e kontrolleve në kampin e muxhahedinëve.
“Mjekët ligjorë e gjejnë se kur ky perona ka ndërruar jetë, shkaet e etj. Kamerat e sigurisë do ndihmojnë nëse ky person ka qenë në mesin e këtyre personave të tjerë, që në momentin që pretendojnë ë se janë sulmuar. Në rast se shteti shqiptar ka strehuar muxhahedinët për qëllime humanitare ky ka qenë kushti i parë , që ata të mos kryejnë asnjë vepër penale që cenojnë vendin tonë dhe vende të tjera, atëherë nëse kjo provohet se ka sulme të tjera, ky është skandal”, tha ajo./ n.m.abcnews.al
