Pep Guardiola, pas humbjes me Chelsea në gjysmëfinale të FA Cup, ka folur për mediat dhe BBC në veçanti, në lidhje me duelin kundër londinezëve. “Kemi luajtur mirë 15 minutat e fundit. E kishim të vështirë të gjenim hapësira, por duhet të përgëzoj skuadrën e Chelsea që mbylli çdo hapësirë. U afruam disa herë, por nuk krijuam raste.
Pësuam golin dhe më pas reaguam mirë, sidomos pasi në lojë u fut Phil Foden dhe Ilkay Gundogan. Nuk është e lehtë të përballesh me një ekip që mbron me tetë futbollistë në 1/3 e fushës së vet. Në këto lloj ndeshjesh diferenca është shumë e vogël. Ne nuk krijuam shumë raste të qarta, por tentuam më shumë”, tha për BBC spanjolli.
“Mungesë impenjimi? Çfarë mund të them? Kishim vetëm dy ditë e gjysmë për t’u rikuperuar dhe për të luajtur jashtë fushe. Duhet të udhëtonim dhe ishim në tren për tre orë, një orë u ndalëm. Çdo lojtar e meritonte të luante, mos thoni që nuk i kushtuam vëmendje kupës, sidomos pasi kemi shkuar në finalen e Carabao Cup katër herë radhazi.
Thoni që e humbëm ndeshjen, pasi është një argument i dobët. Ju nuk shkoni dot në finale disa herë radhazi nëse nuk e vlerëson. Mund ta thoni para ndeshjes që Pep ose lojtarët nuk i kushtojnë vëmendje, por mos e thoni pasi ne humbim një ndeshje. Këta djem luftojmë çdo ndeshje si kurrë më parë. Tani ne nuk i kushtojmë vëmendje?! Ne e respektojmë shumë FA Cup, erdhëm të fitojmë.
Mendoni se Sterling, Gabriel apo Ferran Torres nuk e meritojnë të luajnë? Thuajeni! Kur humbim formacioni është i gabuari, kur fitojmë unë jam një gjeni. Nuk pendohem për zgjedhjet e bëra, sepse u besoj atyre. Nëse nuk do u besoja nuk do të luanin. Sa i takon De Bryune, ai nuk duket mirë. Ka dhimbje, por do të shohim nesër në çfarë gjendje është. Ai do të zhvilloje disa teste mjekësore”. /abcnews.al
