Mbrojtësi holandez, Cerezo Hilgen, ka dhënë një intervistë për sportnieuws.nl, aty ku ka rrëfyer të gjitha problemet që po kalon te Luftëtari. 25-vjeçari u transferua këtë verë tek ekipi gjirokastrit dhe nuk ka pasur marrëdhënie aspak të mira me trajnerin Marantas, të cilin edhe e ka sulmuar, duke e quajtur trajner me fat dhe arrogant, madje e ka krahasuar dhe me trajnerin e njohur, Jose Mourinho. Në një rrëfim të gjatë dhe shumë interesant, Cerezo preku disa problematika, si dhe tregoi shumë prapaskena.
Aventura në Greqi – “Babai im vdiq kur isha në Greqi, atëherë vendosa të bëj pushim dhe të ndahem nga futbolli. Telefonatat vazhduan të vijnë nga skuadra të ndryshme. Kalamata, një klub i kategorisë së tretë në Greqi, vendosi të më telefonojë dhe të më bindë që të nënshkruaj. Së pari thashë jo, por kur shkova të shikoja ambientet e klubit dhe projektin e tyre, vendosa të nënshkruaj. Pata një vit të bukur në një ekip shumë cilësor”.
Transferimi në Shqipëri – “Unë po udhëtoja me të dashurën time. Pastaj mora një telefonatë nga një zotëri nga Shqipëria. Unë i thashë “po” Luftëtarit, por dyshova që në fillim. Unë përcaktova kërkesat e mia dhe ata i plotësuan ato”.
Marantas si Mourinho – “Unë kam një trajner grek, Georgios Marantas. Ai erdhi nga kategoria e tretë greke dhe mendoi se ishte Mourinho. Ai më kishte parë si luaja dhe nuk i pëlqeva aspak. Unë gjithashtu luajta në mesfushë, por jam mbrojtës. Kështu që gjatë stërvitjes, ai u përpoq të shpjegonte diçka, unë e dëgjova. Ai papritmas bërtiti se unë nuk do të luaj nëse nuk e dëgjoja. Unë me të vërtetë mendova, “mik, çfarë dreqin po thua? Ti nuk më njeh dhe fillon të më bërtasësh. Përfundimisht, më uli në stol”.
Stërvitja me të rinjtë – “U stërvita me të rinjtë e Luftëtarit, luajtëm dhe një ndeshje të kategorisë së tretë mendoj. Luajtëm shumë mirë dhe nuk i dhamë asnjë shans kundërshtarit. Fundjavën tjetër, unë nuk isha në grumbullim. Isha unë ai që gjithmonë sulmohej, kështu që kërkova një shpjegim. Trajneri më thoshte se është trupi im problemi kryesor dhe si trajner profesionist, nuk mund të punonte me mua”.
Marantas, më shumë fat se aftësi – “Trajneri është me shumë fat. Ne kemi pasur fat javë me radhë dhe kemi marrë rezultate që nuk i meritonim. Fati i tij u zhduk kundër Skënderbeut, atje ne humbëm 2-0. Ai trajner thjesht gënjeu!”
Dyshimet e Cerezo Hilgen – “E dija që nuk ishte çështje futbolli, trajneri kishte diçka tjetër kundër meje. Në ndeshjen e ardhshme, ne humbëm 4-1. Unë u ngopa dhe nuk duroja më. Mediet pyetën trajnerin pse nuk u aktivizova unë dhe i gënjeu, duke thënë se jam i dëmtuar”.
Pikëpyetjet me kontratën – “Disa javë pas bisedës me trajnerin, më bie telefoni. “Cerezo, dua të tregoj diçka”. Më thanë që më kanë ndërprerë kontratën për shkak të debateve me trajnerin. Unë doja dhe vetë të largohesha gjithsesi, por trajneri më sfidoi që të luftoja. Nuk e kuptoja, pasi është e qartë se ai nuk më dëshironte mua”, përfundoi mbrojtësi holandez./abcnews.al
