Komisioneri Shtetëror i Zgjedhjeve, Ilirjan Celibashi ka treguar sesi do të jetë formati i fletës së votimit për zgjedhjet lokale të 14 majit.
Pyetur nga Abc News, nëse në fletën e votimit do të ketë një vend të posaçëm për të shënuar emrin e kryetarit të partisë, nisur nga problemet e brendshme në Partinë Demokratike, Celibashi u përgjigj se diçka të tillë e parashikon ligji.
“Po, është parashikimi i ligjit. Në fletën e votimit shënohet emri i kryetarit të partisë politike”, theksoi Celibashi.
Ndër të tjera, ai bëri të ditur se aktualisht, 21 parti politike kanë paraqitur kërkesën për t’u regjistruar në zgjedhje.
Lidhur me votimin dhe numërimin elektronik, Celibashi nënvizoi se procesi po ecën mirë dhe shtoi se këto ditë do të hapen procedurat prokuruese për pajisjet.
