Drejtori i Agjencisë Kombëtare të Mbrojtjes Civile, Haki Çako foli për situatën e zjarreve në vend.
Në një komunikim nga fshati Flet në Bashkinë Fushë Arrëz, Çako tha se të gjitha vatrat e zjarrit të konsideruara kritike tashmë janë në kontroll.
Në këtë zonë vijon ndërhyrja nga Forcat e Armatosura nga pushteti vendor si edhe shërbimi pyjor për të izoluar plotësisht flakët.
Më tej ai theksoi se fatmirësisht është arritur të izolohen flakët që kërcënonin kurorën me pisha dhe bredh.
“Kemi arritur të ndërpresim flakët në këtë vend për të mos depërtuar më tej në guroren e fshatit Dardhë. Operacioni vijon nga ajri dhe nga toka. Ndërhyrja do të vijojë edhe ditën e nesërme. Mund të them se thuajse në të gjitha zonat e konsideruara kritike, janë nën kontroll.
I bëj thirrje të gjithë qytetarëve që të ndërgjegjësohen dhe të reagojnë për të parandaluar këtë dëmtim masiv të pyjeve që janë një domosdoshmëri jetike për të gjithë ne. Ne do të vazhdojmë të luftojmë me të gjitha forcat tona për të eliminuar të gjitha vatrat e zjarrit”, tha Çako.
/abcnews.al/
