Bylis koleksionoi fitoren e katërt radhazi në Kategorinë e Parë teksa mposhtën në transfertë Vorën me shifrat 2-3. Ndeshja nisi në mënyrën më të mirë të mundshme për ballshiotët që shënuan dy gola të shpejtë brenda 12 minutash me Camara dhe Lajthia. Por, në fraksionin e dytë, vendasit reaguan dhe barazuan me anë të Jasmin Raboshta që shënoi dy gola.
Rezultati ishte i barabartë deri shtatë minuta para fundit, teksa në të 83-tën shënoi Abazaj për Bylisin që e ruajti më pas avantazhin dhe mori tre pikë shumë të vlefshme. Bylisi mbetet në vendin e parë me 19 pikë ndërsa Vora renditet në vendin e katërt me 12 pikë.
Ndërkohë, Flamurtari fitoi në transfertë ndaj Besës me shifrat 1-2. Vlonjatët shënuan nga një gol për pjesë teksa hapën llogaritë e sfidës me anë të Pjeshkës në minutën e 33-të ndërsa në të 88-tën shënoi edhe Beqja. Dy minuta më pas shënoi edhe Spahiu për kavajasit, por që shërbeu sa për statistikë. Pas këtij trepikëshi, Flamurtari ngjitet në kuotën e 12 pikëve në vend të pestë ndërsa Besa mbetet me katër pikë në vend të 11.
Në ndeshjet e tjera, Apolonia fitoi në Loni Papuçiu me shifrat 4-1 ndaj Tomorit. Fierakët e mbyllën në barazim 1-1 pjesën e parë pas golave të Asllanajt dhe Beckas, por në fraksionin e dytë, vendasit patën një marsh më shumë se kundërshtari duke shënuar edhe tre herë të tjera me anë të Maksutit dhe Repajt që shënoi një dygolësh.
