I ndërtuar gjysmë shekulli më parë, ky burim me ujë të ftohtë në fshatin Bubq mban emrin e një gruaje.
Dikur i thoshin kroi i Hikës, por me kalimin e viteve emri ka ndryshuar, e në pllakatën sipër tij shkruhet “Kroi i Hixës”.
Shumë pak dihet për historinë e gruas, por historinë e personit që e ndërtoi këtë burim, banorët e njohin mirë.
Ai është Qazim Kurti, sot 90 vjeç dhe ka bërë shumë investime në këtë zonë.
“Këtu është një drejtim që ndoshta mund të jetë edhe kroi u fundit, se kjo vjen nga kalaja e Prezës”, thotë një banor.
Burimi iu shërbente udhëtarëve që kalonin aty e vite më vonë edhe banorëve që ndërtuan shtëpitë pranë fshatit Bubq.
“Qazim Kurti ka bërë shumë gjëra të mira në këtë zonë. Por ne jemi popull disi që e mbajmë nën heshtje, nuk e urojmë aq tepër. Ky ka ka bërë çdo gjë për zonën”, u shpreh ai.
Tregojnë se Kurti ka mbjellë shumë pemë madje nën hijen e tyre ka vendosur edhe stola për t’u çlodhur udhëtarët.
Po ashtu ka pajisur rrugën me ndriçim dhe ka mirëmbajtur varrezat e fshatit.
Te gjitha i ka bërë vetë, nuk ka marrë asgjë në këmbim, por gëzon mirënjohjen e gjithë banorëve të zonës.
Qazim Gjoni, banor i Bubqit thotë se fshati ka ndryshuar vitet e fundit, shtëpitë thuajse janë rindërtuar të gjitha pas tërmetit të vitit 2019./abcnews.al
