Nga Erblina Mile
Konkurenca dhe gjetja e tregut janë dy nga problematikat më të mëdha të bizneseve që operojnë në Shqipëri. Në një vrojtim të realizuar nga BANKA E Shqipërisë për pjesën e dytë të vitit të kaluar theksohet se 82% e totalit të ndërmarrjeve që morën pjesë në anketim vlerësuan elementet e “konkurrencës” dhe të “gjetjes së tregut” si ngërçet kryesore në ushtrimin e aktivitetit të tyre.
Elementë të tjerë që kanë ndikuar negativisht në aktivitetin e bizneseve në të gjitha segmentet gjatë kësaj periudhe janë “kostoja e prodhimit dhe e punës” , “përshtatshmëria e legjislacionit në fuqi”, si edhe “disponueshmëria e stafit të kualifikuar” .Këto gjetje janë evidentuar si një sfidë e rëndësishme nga ndërmarrjet e mesme dhe ato të mëdha.
Pavarësisht përmirësimit në 6 muajt e fundit të vitit 2021,indeksi i shitjeve nuk ka arritur ende nivelin e periudhës para pandemisë. Në rang sektorial, indeksi shënoi rritje më të ndjeshme për bizneset në sektorët e industrisë, të shërbimeve dhe të tregtisë.
Për të vijuar aktivitetin rreth 42% e bizneseve në vend kanë marrë një hua. Ngarkesa me borxh ka ardhur në rënie në raport me kapitalin, por mbetet më e lartë në raport me të ardhurat e bizneseve.
Huamarrja e ndërmarrjeve është realizuar vetëm në monedhën vendase për 67% e ndërmarrjeve të vogla, 58% e ndërmarrjeve të mesme dhe 48% e ndërmarrjeve të mëdha, ndërsa pjesa tjetër është në valutë dhe/ose e kombinuar. Ngarkesa me borxh ka ardhur në rënie dhe paraqitet më e lartë tek ndërmarrjet e sektorit të shërbimeve dhe ato të ndërtimit. Lidhur me planifikimin për huamarrje në gjashtëmujorin e ardhshëm, përgjigjet e ndërmarrjeve tregojnë se kërkesa për kredi pritet të forcohet./abcnews.al
