Loading ...
Një stuhi e fuqishme dhe e papritur përfshiu pasditen e kësaj të enjteje qytetin e Agrinios në Greqi, duke i dhënë fund menjëherë motit të kthjellët dhe atmosferës verore. Brenda pak minutash, reshjet e dendura u shoqëruan me erëra të forta dhe breshër të madh, duke shkaktuar probleme në disa zona të qytetit.
Erërat e forta rrëzuan pemë dhe objekte në rrugë, ndërsa banorët dhe vizitorët u detyruan të kërkonin strehim për t’u mbrojtur nga moti i përkeqësuar.
Breshëri i dendur mbuloi në disa zona rrugët e qytetit, ndërsa reshjet intensive shkaktuan grumbullime të mëdha uji dhe përmbytje të përkohshme.
Rrugët Eleftheriou Venizelou dhe Iroon Polytechniou u përfshinë nga ujërat, duke vështirësuar ndjeshëm qarkullimin e automjeteve.
Sipas raportimeve të mediave lokale, situata solli edhe mobilizimin e shërbimeve të emergjencës. Departamenti i Zjarrfikësve në Agrinio mori 25 thirrje për ndihmë gjatë kohës që zgjati stuhia.
Shumica e ndërhyrjeve lidhej me prerjen dhe largimin e pemëve të rrëzuara nga erërat e forta, ndërsa zjarrfikësit u angazhuan gjithashtu për largimin e ujit nga bodrumet e përmbytura.
Pavarësisht intensitetit të fenomenit, autoritetet nuk raportojnë për dëme me përmasa katastrofike, ndërsa ekipet e emergjencës vijuan ndërhyrjet në zonat e prekura.
