Erjon Braçe mezi e pret rastin dhe “godet” nga Fieri, ku ishte krah kryeministrit Edi Rama duke vëzhguar nga afër fushat sportive të bëra në një shkollë. Kur kreu i qeverisë i thotë Braçes që këtë fushën le ta bëjë federata, zëvendëskryeministri nuk duron.
“Kë të bëjë federata? Mos ma fut mua këtu atë, i bëjmë vet ne, s’kemi nevojë”, shprehet Braçe. Deklarata e tij nuk ka kaluar pa u vënë re dhe online lajmi ka marrë dhenë, sikurse ka sjellë edhe reagime.
Agustin Kola, legjenda e Tiranës dhe trajneri i Shqipërisë U17 për femra, në llogarinë e tij në “Facebook” ka reaguar duke shkruar: “Erioni i vogël, i fushave të mëdha.
Zv/problemi më i vogël i shoqërisë shqiptare, në ekonomi, politikë dhe ca më keq në sport, i shkurtër në mendje dhe ide, sa një fushë minifutbolli shkolle, vazhdon të “ulërasë” me zërin e miut.
Ky “gjysmë-luan”, e “gjysmë-mi” me këtë shpirt opozitari, shqetësohet vetëm për një gjë: Për suksesin e të tjerëve. I ruajtë Zoti… trupmendjeshkurtërit”. /abcnews.al
