Një trafikant droge shqiptar 54-vjeç, i cili konsiderohet nga autoritetet greke si një nga më të mëdhenjtë e kokainës dhe hashashit në Evropën Juglindore, ra në prangat e policisë të premten, por emri i tij nuk bëhet publik nga vendi fqinj.
Mediat greke shkruajnë se 54-vjeçari thuhet se ka qenë i përfshirë shumë në trafikun e drogës me mafian turke në vitet e fundit, duke shitur hashash shqiptar dhe duke marrë heroinë të pastër nga Afganistani dhe Pakistani, pra në këmbim. Sidoqoftë, për shkak të pandemisë së koronavirusit , grekët thonë se ai ndryshoi strategjinë duke kultivuar kanabis në ambiente të brendshme.
Për këtë arsye, ai kishte marrë me qira një hapësirë tre katëshe në Atikë dhe kishte instaluar një sistem të plotë laboratorik dhe kultivimi hidroponik brenda, të cilin synonte ta “hidhte” në tregun e Athinës me një fitim që llogaritej 500 mijë euro. Tre shqiptarë kujdeseshin për kanabisin dhe u lejohej që të dilnin vetëm një herë në muaj, ndërsa për ushqimin dhe gjithçka tjetër kujdesej kapoja.
“54-vjeçari ishte një mysafir i rregullt në klubet e natës. Ai u shfaq si një biznesmen i pasur nga Shqipëria. Ai u sigurua që të bënte botox që të dukej “i freskët”, ndërsa, në të njëjtën kohë, lëvizte me një makinë luksoze për të plotësuar imazhin e tij si i suksesshëm. Por policia zbuloi se përmes kësaj mënyre ai trafikonte drogën” shkruan media greke.
Policia sekuestroi 1800 fidanë, 1 kg e 355,8 gram kokainë, 6 makina, 11505 euro, pistoletë, 41 gëzhoja, 2 grushte hekuri, 2 peshore precize, por edhe pajisjet për kultivimin e kanabisit./ db/Abcnews.al
