Një biznes i ëmbël, jo vetëm nga produkti që prodhon, por edhe të ardhurat.
Por, nuk mund të konsiderohen të ëmbla problemet, që shoqërojnë prodhuesit ndër vite.
Vitor Maluta, kryetar i Konfederatës së Bletërritësve të Shqipërisë në Mat, thotë se ky sektor nuk duhet të shihet vetëm në aspektin e përfitimit nga produktet e bletës, por edhe si një kontributor i madh në ruajtjen e biodiversitetit.
“Problemi kryesor janë dëmtimet dhe mosvlerësimi i bletarisë për rolin e vërtetë që ata luajnë në pllenimin e kulturave bujqësore. Duhet theksuar se roli i vërtetë i bletarisë është ndikimi që ka në pllenimin e kulturave bujqësore dhe ruajtjen e biodiversitetit. Ky rol nuk vlerësohet mirë”, thotë Vitor Maluta.
Dëmtimet në bletari vitet e fundit kanë qenë të shumta.
“Vitet e fundit në Shqipëri ka shumë dëmtime të cilat kanë shkuar deri në 40% të totalit. Nëse do ta marrim në shkallë kombëtare dëmi kalon 15-20 milion euro në vit, pavarësisht se bletarët i rikuperojnë këto dëmtime, ajo është një vlerë e konsiderueshme dhe një pasuri kombëtare që dëmtohet”, trego ai.
Kryetar i Konfederatës së Bletërritësve të Shqipërisë, tregon për faktorët që kanë ndikuar.
“Dëmtimi i natyrës nga njeriu, si djegia e pyjeve, përdorimi i pesticideve, dëmton habitatin e mbarështrimit të bletëve, po ashtu faktor janë edhe sëmundjet e bletëve”, thotë ai.
Por numri i të rinjve që po shfaqin interes dhe po ua kushtojnë kohën e tyre bletëve po bëhet gjithnjë më i vogël.
Gjithashtu Vitor Maluta thotë se në universitet mungon dega për bletarët.
“Duhet theksuar se nuk ka diçka të organizuar për trajnimin e bletarëve. Sot në strukturat e shtetit nuk ka një specialist të mirëfilltë që përgjigjet për bletarinë. Po ashtu në Fakultetin e Veterinarisë mungon një degë e masterit për të nxjerrë specialistë për bletarinë”, sqaroi Maluta.
Ai u bën apel institucioneve që ti kushtojnë më shumë vëmendje këtij sektori dhe të krijohet mundësia për trajnimin e bletarëve.
/abcnews.al/
