Dallëndyshe Bici ka marrë zyrtarisht drejtimin e Agjensisë së Kadastrës Shqiptar. Kryeministri Edi Rama e argumentoi largimin e Aran Lames me nevojën për energji të reja në këtë institucion dhe perfundimin e reformës së pronësisë.
Kreu i qeverisë kërkoi që prioritet i drejtuese së re të jetë prerja e bishtave të korrupsionit që lëvizin nëpër zyra.
Për Dallëndyshe Bicin emërimi në krye të Kadastrës është një sfidë shumë e madhe.
Artan Lame hodhi poshtë argumentin se mund të kandidojë në zgjedhjet e 14 majit duke theksuar se largohet për shkak të shëndetit.
Pjesë nga fjala e Ramës:
Sot kemi një bazë nga e cila mund të shkojmë me shpejtësi më tutje që është teknologjia dhe proceset e nisura na kanë dhnë mundësinë të shërbejmë pa radha dhe qytetarët ta kërkojnë shërbimin on line. Por jemi në kushte kur cikli mbetet I hapur sepse përgjigjet jepen ende me letër. Na duhen hapa të shpejtë dhe zgjidhje radikale për të mbyllur procesin.
Kadastra është banka më e rëndësishme e vendit, është banka e pasurive të paluajtshme dhe kërkon që të sillet si e tillë dhe të funksionojë si e tillë, në të gjitha aspektet. Na takon të kërkojmë shumë më tepër nga vetja cdo ditë. Duhen eleminuar të gjitha zonat ndarëse, s’ka më me zona e me cifligje e sfera influence.
Kadastra dhe i gjithë personeli duhet të hyjë tërësisht pas ekranit dhe të zhvillojë gjithë veprimtarinë e vet. Do duhet një bashkëpunim shumë i ngushtë me AKSHI-n që procesi të marrë një tjetër vrull dhe të hyjë në një tjetër fazë. Duhet patjetër që të merren masa shumë serioze lidhur me bishtat e të keqes në institucion, të pisllëkut dhe korrupsionit që janë të kudondodhur në kadastër.
Një nga detyrat, të merret me një task forcë të brendshme për të cuar aty ku e kanë vendin të gjithë ata që kanë luajtur për interesa të tyre.
Duhet bashlëpunim edhe me prokurorinë, që ka të bëjë më korrupsionin e të kaluarës. Që prodhon edhe sot AMTP që jepen tani e pretendohet se janë dhënë në ‘91, ndaj duhet të përfshijë edhe institucione të tjera në mes.
Fenomeni i nxjerrjes dhe i kokëdaljes së AMTP në prona të konsoliduara, është një fenomen që nuk duhet të lejohet të marrë formë. Duhet një punë intensive për të trajtuar problemin e përcartjeve të institucioneve lidhur me legalizimet dhe për procesin e dhënies në dorëzim të tokave që janë jashtë rruzullit të 7501.
Duhet në fund të ditës future në punë shërbimi satelitor që puna e kadastrës të marrë dimension teknologjik. Problematika bazë e kadastrës mbetet stabiliteti I burimeve njerëzore dhe cilësia, kërkohet që kadastra të vijojë të blindohet për të mos lejuar influencat e jashtme. Nuk duhet t’i shkojë kujt në mend se Kadastra është një zyrë punësimi. Përgjegjësia është e përgjithshme por edhe politike, ndaj është pjesë e punës së përbashkët ku përgjegjësinë kryesore e ka qeveria.
Për të gjithë ata që punojnë në administratën shtetërore, lidhur me trimërinë dhe frikën. Dëgjoj se janë trembur dhe kanë frikë të firmosin, s ka askush pse të ketë frikë nëse zbaton ligjin.
Procesi i perpjekjes per te vendosur disa pika mbi ‘i’, në raport të zyrtarëve me ligjin duhet të trembi ata që duan ti bëjnë ligjit bisht. Cdo bishtnim në sistemet dixhitale të kadastrës për të bërë truke, dhe do futje e të keqes pas shpinës së shteti nuk do tolerohet. Do ndiqet si prioriteti i prioriteteve.
Një task forcë speciale do ngrihet menjëherë për të prerë bishtat e korrupsionit që lëvizin në zyrat e kadastrës. Ju kemi premtuar njerëzve prona të sigurta dhe shërbimet do i marrin pa lëvizur nga vendi, duke nxjerrë celularin dhe duke e pasur ne telefon pronën e tyre. Është bërë një punë e madhe por e pamjaftushem, ndaj duhet të shkojmë më tutje.
