Më pak se dy muaj përpara se votuesit europianë në 27 vende të marrin pjesë në zgjedhjet e Parlamentit të BE-së, Belgjika thotë se po heton rrjetet pro-ruse që po përpiqen të ndikojnë në votim.
Qëllimi i Moskës është të ketë më shumë kandidatë pro-rusë në Parlamentin Europian, tha kryeministri Alexander de Croo.
“Mbështetja e dobësuar për Ukrainën i shërben Rusisë në fushën e betejës,” tha ai.
Qeveria çeke tha kohët e fundit se kishte shkatërruar një rrjet pro-Kremlinit.
Duke iu referuar zbulimeve çeke, kryeministri Alexander de Croo tha se inteligjenca belge kishte konfirmuar se rrjetet e spiunazhit po vepronin në Belgjikë dhe në disa vende të tjera europiane.
“Hetimi tregon se Moska i është afruar anëtarëve europianë të parlamentit, dhe ka paguar gjithashtu anëtarët e parlamentit europian për të promovuar një axhendë pro-ruse këtu,” tha kryeministri belg.
Një numër politikanësh në të djathtën ekstreme në Europë shihen si dashamirës ndaj Rusisë. Raportet çeke kanë sugjeruar se Zëri i Europës ka paguar politikanë nga Gjermania, Franca, Polonia, Belgjika, Holanda dhe Hungaria në këmbim të komenteve pro-ruse për të ndihmuar në ndikimin në zgjedhjet e 6-9 qershorit.
/abcnews.al
