Bedri Greca e mbyll me Laçin. Sulmuesi anësor, që në janar la Gjilanin dhe u vesh bardhezi, ka vendosur ta vijojë sërish karrierën në Kosovë. Kontrata me kurbinasit i mbaroi dhe menjëherë është bindur nga oferta e bërë prej Feronikelit, klubit të tij të ri.
NJOFTIMI – Pas një periudhe të kaluar te SC Gjilani, Bedri Greca është rikthyer përsëri në Superligën e Kosovës. Greca i është bashkuar FC Feronikelit nga Klubi i Futbollit Laçi, gjatë afatit kalimtar të verës, duke i dhenë shtytje sulmit të skuadrës tanë.
Pozita natyrale e tij është si anësor sulmi, përkatësisht anësor i djathtë, por i aftë të luajë edhe si qendërsulmues por edhe anësor i majtë. I përshtatshëm, i gjithanshëm edhe i gatshëm për të tre pozitat e sulmit.
Bedri Greca është i lindur më 23 tetor 1990, në Tiranë, i gjatë 1,93 dhe këmba e tij e preferuar është e djathta. I njohur për depërtimet e tij dhe harkimet e sakta në zonë, Greca pritet të jetë “armë” tejet e fuqishme për klubin, sidomos për repartin ofensiv.
Bedri Greca shumicën e karrierës së tij e ka kaluar në Kategorinë Superiore të Shqipërisë, përkatësisht në skuadra si: KF Flamurtari, KF Kukësi, KF Tirana. Ai kishte një aventurë tjetër në Kosovë para ardhjes te FC Feronikeli, ku gjatë vitit 2019 ju bashkua SC Gjilanit.
Greca është prezantuar sot në ambientet e FC Feronikelit, nga zëvendës Presidenti i klubit, Ragip Veseli dhe nga Drejtori i Përgjithshëm, Artan Berisha. FC Feronikeli do të ketë edhe prurje të reja gjatë ditës. /abcnews.al
