Besëlidhja jetoi suksesin e parë në sezonin e ri të basketbollit për meshkuj.
Skuadra lezhjane fitoi Superkupën e Shqipërisë për meshkuj, pasi mundi në finale Tiranën me rezultatin e thellë 100-57.
Diferenca e madhe në shifra tregon qartë dominimin e Besëlidhjes, që mori shpejt kryesimin dhe e ruajti atë deri në fund.
Një paraqitje e shkëlqyer e skuadrës së drejtuar nga Afrim Bilali, që imponoi ritmin dhe rezultatin e finales së luajtur në pallatin e sportit “Apolonia” të Fierit.
Lojtari më i mirë i ndeshjes u shpall, Julian Hamati, që shënoi 15 pikë, kapi tetë topa në tabelë dhe dha 4 asist në triumfin e lezhjanëve.
Me fitimin e Superkupës së Shqipërisë, Besëlidhja ka nisur në mënyrën më të mirë edicionin e ri të basketbollit për meshkuj, duke shpallur kandidaturën serioze edhe në garën për titullin kampion.
Ndërkohë, trofeu i Superkupës në basketbollin për femra u fitua nga Flamurtari.
Skuadra vlonjate mundi në finale Tiranën me rezultatin 81-59. /abcnews.al
