Basha për emigrantët: Kriminale, lejojini të kalojnë, karantinojini te Konvaleshenca dhe bëjuni testin

schedule21:50 - 5 Prill, 2020

schedule 21:50 - 5 Prill, 2020

Kreu i Partisë Demokratike, Lulzim Basha përsëri ka reaguar në lidhje me emigrantët e mbetur në kufijtë shqiptar.

Basha kërkon që qeveria të lejojë kalimin e emigrantëve që prej ditësh ndodhen në tokë neutrale në kushte të vështira.

Ai thotë se emigrantët të transportohen dhe futen në karantinë në Kavaleshencë në Durrës dhe t’u bëhet testi.

Për Bashën braktisja e tyre nga shteti është kriminale dhe çnjerëzore.

“Është e pafalshme dhe çnjerëzore që prej 4 ditësh dhjetëra nga bashkëqytetarët tanë janë lënë në mëshirë të fatit, në tokë asnjanëse mes Shqipërisë dhe Greqisë. Një braktisje e tillë mizore përbën një krim kaq të rëndë, sa asnjë shoqëri e civilizuar nuk mund ta falë, dhe që një prokurori me një fije integritet nuk mund të mos e hetojë. I bëj thirrje qeverisë të lejojë këta bashkëqytetarë të hyjnë në atdheun e tyre. Të merren masa për transportin dhe strehimin e tyre në qendrën për karantinim në konvaleshencën e Durrësit. Të bëhet testimi i tyre dhe më pas në varësi të gjendjes shëndetësore të dërgohen pranë shtëpive dhe familjeve të tyre. Braktisja e tyre në këtë kohë të vështirë është e papranueshme, është kriminale“, shkruan Basha./abcnews.al