Avokati i Klement Balilit është shprehur para mediave se klienti i tij është vetëdorëzuar në polici për t’u përballur me akuzën që është ngritur ndaj tij. Sipas tij, Balili nuk i është shmangur asnjëherë drejtësisë. Thoeodhori Sollaku tha se klienti i tij ka marrë vetëm garanci ligjore dhe se në dosjen kundër tij nuk ka prova.
Theodhori Sollaku: Klement Balili është vetëdorëzuar në polici për të përballur me akuzën që është ngritur ndaj tij. Është e vërtetë që ka qenë në kërkim policor, por duhet të jemi të ndërgjegjshëm që në momentin e daljes së urdhrit të arrestit megjithëse nuk kishte asnjë provë trysnia ka qenë shumë e fortë për ta arrestuar. Prokuroria dy vjet më parë ka kërkuar prova nga Greqia sepse dosja nuk kishte prova megjithëse kishte urdhër arresti. Tani që erdhi letërporosia e plotësuar me akte proceduriale dhe hetimet janë drejt përfundimit, shtetasi Klement Balili vendosi të dorëzohej sepse ç’do bënte këto dy vjet. Shteti do paguante ushqimin, fjetjen do mbante policë për ta ruajtur në burg. Edhe kjo duhet marrë në konsideratë sepse kostoja e një të burgosuri është 50 euro në ditë që i thonë gati 50 mijë euro. Megjithëse kjo është dytësore. Një gjë po ju them që shtetasi Klement Balili nuk i është shmangur asnjëherë drejtësisë sepse gjatë dy vjetëve drejtësia shqiptare nuk ka kryer asnjë veprim procedurial.
Në çfarë kushtesh është dorëzuar?
Theodhori Sollaku: Është e vërtetë që këto ditët e fundit është negociuar midis policisë dhe familjarëve dhe sot u gjetën modalitetet për t’u dorëzuar.
Çfarë garancish ka marrë Balili?
Theodhori Sollaku: Garanci vetëm ligjore.
Do kërkohet gjykim i shkurtuar?
Theodhori Sollaku: Ne do jemi në përfundim të procedurës së fazave të hetimit. Do të njhemi me aktet përfundimtare që ka prokurori dhe këtu do jemi në seancat në vazhdim. Gjatë gjykimit të themelit do shohim si do ecë çështja. Megjithatë mund t’ju them që dosja është në atë gjendje që ka qenë para dy vjetëve. Provat janë të dyshimta. Nuk ka asnjë implikim nga asnjë dëshmitar. Nuk ka asnjë bisedë telefonike të përgjuar. Pretendohet që një numër grek i përket Balilit ndërkohë si në Shqipëri dhe në Greqi kush blen një numër telefoni identifikohet me kartë identiteti apo me pasaportë dhe në këtë aspekt do thosha që akuza ngelet e dyshimtë.
Klement Balili u dorëzua mëngjesin e kësaj të hëne. Ai ishte në kërkim ndërkombëtar për trafik droge dhe pjesëmarrje në grup të strukturuar kriminal.
