Automjeti del nga rruga në Vlorë, dy persona përfundojnë në spital

Një aksident është regjistruar mbrëmjen e së mërkurës në aksin rrugor Peshkëpi-Kotë.

Ngjarja ndodhi rreth orës 20:30 kur një automjet tip Volkswagen, me targa AB541TT, doli nga rruga dhe përfundoi duke goditur një shtyllë të tensionit.

Sipas të dhënave paraprake, në mjet udhëtonin dy shtetas, të cilët u transportuan me autoambulancë drejt Spitalit Rajonal të Vlorës. Fatmirësisht, dy të lënduarit ndodhen jashtë rrezikut për jetën.

Në vendngjarje shkuan menjëherë shërbimet policore, të cilat po punojnë për sqarimin e rrethanave të aksidentit.