Loading ...Policia e Lezhës ndaloi punonjësin Besart Kovaçi, pjesë e patrullës së përgjithshme në policinë vendore të Lezhës, për veprën penale “shpërdorim detyre”, në lidhje me ngjarjen në Rrilë, ku mbeti i plagosur berberi Sokol Daci.
Sipas informacioneve të marra nga ‘AbcNews’, Kovaçi ndodhej brenda berberhanes gjatë atentatit dhe qëlloi me armën e shërbimit në drejtim të autorëve.
Burime pranë policisë së Lezhës bëjnë të ditur se Kovaçi ishte shoqëruar nga Merando Nikulaj, nip i Ardian Nikulajt, i cili dyshohet të ketë qenë shënjestra kryesore e sulmit.
Në ambientet e berberhanes u gjetën 16 gëzhoja pistolete, nga të cilat disa dyshohet se i përkasin armës së përdorur nga Kovaçi. Një gëzhojë tjetër që nuk i përket të njëjtës armë të efektivit ka ngritur dyshime për përdorimin e një armë të dytë në këtë shkëmbim zjarri.
Pamjet e kamerave të sigurisë tregojnë dy automjete që mbërrijnë përpara berberhanes, një Audi dhe një Passat.
Nga mjetet, zbresin 7 persona, dy me kallashnikov, por edhe 3 të tjerë që duket se kanë armë zjarri. Në drejtim të berberhanes u qëlluan mbi 30 plumba, tre prej të cilëve plagosën Sokol Dacin.
Policia dyshon se I plagosur mund të ketë ngelur edhe Merando Nikulaj, pasi shihet në pamjet filmike duke u larguar me vështirësi. Uniformat blu po kryejnë kontrolle për ta gjetur atë.
Sipas hetuesve, të dyshuar në këtë ngjarje janë përfshirë 4 shtetas, të cilët dyshohet se janë nga fisi Ndoka. Ata akuzohen për veprat penale “Vrasje me dashje, e mbetur në tentativë” dhe “Mbajtje pa leje të armëve të zjarrit dhe municionit dhe lëndëve shpërthyese”.
