Loading ...“Më ka thënë jam hedhur nga ballkoni e kam provuar dhe vetë dhe jam ringjallur, prandaj jam këtu ku jam. Na e tha në orë të mësimit, na vuri dhe muzikë”, tha një vajzë.
Ministria e Arsimit nuk do t’i përfshijë organet hetimore për të zbardhur këto akuza të rënda në drejtim të mësuesit të anglishtes Dritan Zaimi në shkollën publike 9-vjeçare “Gustav Mayer” në Tiranë.
Aktualisht do të mjaftohet vetëm me largimin nga puna. Masë që Abc News ka mësuar se mësuesi nuk e ka ankimuar. Burime i thanë Abc News se ai ndodhet në gjendje të rënduar psikologjike.
Organi i akuzës në Tiranë dhe policia gjithashtu konfirmojnë për Abc News se nuk kanë nisur hetim kryesisht për mësuesin e anglishtes.
Pavarësisht se sipas ligjit shkolla është laike dhe nuk duhet të promovojë fe të caktuara para ankesës se bërë nga dy prindër nxënës të arsimit 9 vjeçar tek “Gustav Mayer” merrnin mësime të tilla.
Vetëm pasi prindërit iu drejtuan drejtorisë së shkollës ajo bashkë me shërbimin psikosocial hyri në orën e anglishtes. Sipas ministrisë së Arsimit ato administruan materiale të përdorura gjatë procesit mësimor dhe ndoqën procedurat deri në ndërprerjen e njëanshme të kontratës së punës me mësuesin e anglishtes Dritan Zaimi.
Për ngjarjen Abc News kërkoi të komunikonte me drejtoreshën e shkollës “Gustav Mayer”, por ajo nuk pranoi të fliste. Ndërkohë që situata lë të hapur mundësinë rikthimit të këtij mësuesi në institucionet arsimore, ajo nxjerr në pah nevojën për monitorim real të orëve mësimore nga drejtuesit e shkollave.
