Kreu i Bindjes Demokratike Astrit Patozi ka komentuar protestën e degës së Lëvizjës Vetëvendosje në Shqipëri kundër vizitës së Presidentit të Serbisë Aleksandër Vuçiç duke e ironizuar jo pak atë.
Përmes një statusi në Facebook, Patozi shprehet se kështu siç kanë ardhur gjërat, vetëm protestuesit e Vetëvendosjes në Tiranë mund ta rrëzonin kryeministrin Rama nga pushteti.
“Zoti e ndihmoftë Shqipërinë për të ardhur sa më shpejt dita që ata të merren seriozisht dhe populli t’i ndjekë e t’u besojë!
Vetëm atëherë mund të shpresojmë se do të shpëtojmë, jo vetëm nga kjo qeveri e korruptuar, por edhe nga hallet dhe dertet e tjera, që na kanë pllakosur në këto ditë të vështira, jo thjesht nga tërmeti”, shkruan më tej Patozi.
Postimi i plotë
TË VETMIT QË MUND TA RRËZOJNË EDI RAMËN
Këta opozitarët radikalë, që i kërkojnë llogari Ilir Metës për “krimin” e takimit me djalin e Xhorxh Sorosit dhe Lulzim Bashës pse nuk protestoi në krah të degës së Vetëvendosjes së Tiranës kundër Mini-Shengenit ballkanik, duket se janë të vetmit që mund ta rrëzojnë regjimin e korruptuar të Edi Ramës.
Sepse kanë gjetur, jo vetëm shkakun, por edhe kohën e duhur për të na ndriçuar dhe bindur si shqiptarë se përse punët tona na shkojnë kaq keq.
Zoti e ndihmoftë Shqipërinë për të ardhur sa më shpejt dita që ata të merren seriozisht dhe populli t’i ndjekë e t’u besojë!
Vetëm atëherë mund të shpresojmë se do të shpëtojmë, jo vetëm nga kjo qeveri e korruptuar, por edhe nga hallet dhe dertet e tjera, që na kanë pllakosur në këto ditë të vështira, jo thjesht nga tërmeti.
