Astrit Patozi

patozi-770x470-770x433-1.jpg
nev ila21:23 | 28/03/2020

Koordinatori i “Bindjes Demokratike” Astrit Patozi ka reaguar në lidhje me dërgimin e mjekëve shqiptarë në Itali të cilët do të jenë në vijën e parë në trajtimin e të sëmurëve nga koronavirusi.

Sipas Patozit ky është një gjest i bukur që vlen të përshëndetet pavarësisht e kujt është merita.

Patozi shkruan se duhet që qeveria të ndërpresë tenderat ndryshe i bie që kjo luftë nuk është njëlloj për të gjithë popullin.

Për Patozin ma e parë që duhet marrë nga qeveria është që “të ndërpritet çdo shpenzim i panevojshëm apo që mund të shtyhet në kohë, në mënyrë që Shqipëria të ketë, jo arnime që ndryshojnë përditë, por një buxhet të plotë lufte”.

Postimi i plotë:

“MOS E ZHVLERËSO SAKRIFICËN E HERONJVE TË LUFTËS!

Dërgimi i ekipit të mjekëve dhe infermierëve shqiptarë në Itali ishte një gjest i bukur, që ia vlen të përshëndetet dhe për këtë nuk ka nevojë të jesh patjetër shqiptar. Zihuni gjithë ditën me Tritanin, po të doni, se e kujt është merita, se nuk na prish shumë punë. Ti bërtit sa të mundesh që i dërgoi qeveria dhe i përcolle me dorën tënde 1 metër larg në Rinas, ndërsa ai të këmbëngulë gjithë ditën se ata i çoi atje vetëm ndërgjegja e tyre.
Por ndërpriti ato tenderat e turpshëm, se nuk mund të bëhet dashuri në kohën e kolerës. Ndryshe i bie që kjo luftë nuk qenka njësoj për të gjithë, por vetëm për një pjesë të popullit. Nuk ka asnjë kuptim që në këto ditë të adresohen fonde për rehabilitimin e qendrave të qyteteve, ndërkohë që, nëse armiku na vë përpara, nesër mund të mos na duhen më fare qytetet.
Në rast se shumica e popullit po sillet dhe po jeton realisht si në luftë, nuk mundet që një pjesë e vogël zyrtarësh apo shqiptarësh të zgjedhur të hanë e pinë njësoj si në kohë të Zogut. Masa e parë që ka vlerë në këtë rast është që të ndërpritet çdo shpenzim i panevojshëm apo që mund të shtyhet në kohë, në mënyrë që Shqipëria të ketë, jo arnime që ndryshojnë përditë, por një buxhet të plotë lufte.
Ndryshe, zhvlerësohet çdo sakrificë që po bën një popull i tërë në karantinë dhe hidhen në kosh edhe akte të tilla vetëmohimi dhe soledariteti si ai i ekipit sanitar, i cili mbërriti sot në Romë për t’ju gjendur në krah Italisë mike, që po e vuan më shumë se kushdo tjetër pandeminë botërore të COVID 19″./abcnews.al

astrit-patozii.jpg
ger ta13:38 | 20/03/2020

Kreu i Bindjes Demokratike Astrit Patozi shprehet se masa e kufizimit të lëvizjes së lirë me orar duhet të rishikohet.

Përmes një postimi në Facebook, Patozi shkruan se nëse takohemi qoftë edhe për 5 minuta me gjithë lagjen, atëherë nuk ka kuptim izolimi për shumë orë.

Postimi i plotë:

Liridalja me orar mund ta shtojë rrezikun e infektimit

Në rast se koncepti i karantinës masive në shtëpi është që të evitojmë infektimin të gjithë njëherësh, atëherë nuk ka asnjë kuptim kjo liridalja jonë me orare. Sepse në kohën e lejuar i bën njerëzit të grumbullohen masivisht në të njëjtat pika jetike, që janë dyqanet e ushqimeve, farmacitë dhe bankat. Dhe pastaj na rroftë izolimi për 23 orët e tjera, në rast se për 5 minuta takohemi me të gjithë komshinjtë e lagjes në supermarket.

Nga ana tjetër, nuk ka asnjë logjikë që ushqimoret dhe farmacitë të qëndrojnë hapur gjithë ditën, ndërkohë, kur ato mund të “sulmohen” nga blerësit vetëm në dy fashat orare, që ka caktuar qeveria. Kam përshtypjen se ata që e kanë ndarë mendjen të dalin nga shtëpia, do ta gjejnë në të gjitha rastet mënyrën dhe e gjithë çështja është të mos e bëjnë këtë të gjithë njëkohësisht.

Nuk dua aspak të hap një debat të panevojshëm, sepse është momenti më i papërshtatshëm për këtë, por mendoj se kjo masë duhet të rishikohet, duke ndjekur praktika të tjera të vendeve më të prekura në Europë, sepse kam frikë se këtë lloj kufizimi me orar e kemi vetëm ne.

/abcnews.al

astrit-patozi.jpg
nev ila21:03 | 06/03/2020

Koordinatori i Bindjes Demokratike Astrit Patozi në një postim në facebook, shkruan se shqiptarët duhet të përgatitën për më të keqen, që të mos ketë reformë fare, ndërsa polemikat e sotme i sheh si një arsye që shpiket nga palët që të mos bien dakord në tryezë Oerd Bylykbashi dhe Damian Gjiknuri.

Gjithashtu Patozi thotë se propozimi i kreut të demokratëve, Lulzim Basha për “parlamentin me dy dhoma”, nuk u shërben qytetarëve sepse shqiptarët nuk e kanë problemin se si t’i strehojnë deputetët, por se si t’i zgjedhim ata.

Reagimi i Patozit:

“PO KËRKOHET NJË “KOPIL” PËR DËSHTIMIN E REFORMËS

Qofsha i gabuar, por duket sikur po bie që tani era e keqe e dështimit të reformës zgjedhore. Debati që ka nisur mes sherrxhinjve të përhershëm nuk ka të bëjë me çështje të Kodit Zgjedhor apo të sistemit politik, por me sa duket po zhvillohet për t’i ngecur kundërshtarit faturën. Ose me popullorçe “kopilin” në prehër.

Dhe këtu nuk është fjala për 15 marsin, sepse është e sigurt që atëherë nuk do të ketë ndonjë produkt, por kam frikë se duhet tëë përgatitemi për më të keqen, që të mos ketë reformë fare, ose parlamenti të votojë ndryshime të papërfillshme, të cilat nuk e prishin qetësinë e statuskuosë.

Edhe polemikat e sotme në këtë dritë duhen parë. Është e qartë se po shpiken arsye për të mos rënë dakord në tavolinë Oerdi me Damianin, ndërkohë që Edi dhe Luli janë në të njëtën gjatësi vale, kur vjen puna për mosndryshimin, edhe pse në distancë.

Sa për këtë propozimin e parlamentit me dy dhoma, mund të thuhet vetëm kaq: ne nuk e kemi problemin se si t’i strehojmë dhe ulim në sallë deputetët, por se si t’i zgjedhim ata. Në rast se do të ruhet ky sistem i shpifur, ku njerëzit votojnë vetëm për kryetarin e partisë, edhe me 140 dhoma po ta bësh Kuvendin e Shqipërisë, nuk do të kishte asnjë vlerë, sepse do të ishte e njëjta gjë“, shkruan Patozi./abcnews.al

 

WhatsApp-Image-2020-03-05-at-18.54.49.jpeg
nev ila18:24 | 05/03/2020

I ftuar në studio me Endri Xhafon, në ABC News, ishte Koordinatori i Bindjes Demokratike, Astrit Patozi.

Patozi ndau me opinionin publik, bindjet e tij në lidhje me situatën politike, krijuar ditët e fundit, mes presidencës dhe mazhorancës.

Sipas Patozit, të dy palët politike ose “dy gjelat” siç i quajti ai, duke iu referuar Ramës dhe Metës, po bëjnë lojën e tyre politike për të fituar më shumë terren. Sipas Patozit të dy palët politike janë përfshirë në një terren shkeljesh ligjore, dhe lufta e tyre gjoja në interes të vendit, është hipokrite.

Pjesë nga biseda në studio:

Endri Xhafo: Ka një shprehje që thotë, kur i mëncuri tregon hënën budallai sheh gishtin, pavarësisht motiveve të Ilir metës dhe pavarësisht backgroundit të Ilir Metës, pavarësisht asaj që e motivon, a ka të drejtë Ilir Meta në argumentet e tij se mazhoranca po kërkon të kapë Gjykatën Kushtetuese?

Astrit Patozi: Nëqoftë se do jemi të drejtë duhet të themi që të dy palët  qeveria dhe presidenti, po tentojnë në mënyrën e tyre ta kapin gjykatën kushtetuese, kjo ndodh brenda lojës politike. Ku është kapërcimi? Ilir Meta thotë që po e shkel kushtetutën Edi Rama dhe populli duhet të ngrihet. Nga ana tjetër mazhoranca thotë se Ilir Meta kërkon të kapë gjykatën Kushtetuese. Por kush e ndan këtë gjë? Unë si qytetar që kam zero respekt për të dy? Unë, mendoj se një palë e tretë duhet ta vendosë, jo ata vetë. Dëgjova Edi Ramën që thoshte Vojua amerikan për presidentin dhe pastaj dëgjova edhe Presidentin që thoshte gruaja e Bilalit. Tani midis gruas së Bilalit dhe Vojos amerikan unë nuk zgjedh asnjërin, pra një palë e tretë duhet të vendosë. Në mungesën e Gjykatës Kushtetuese, kemi një instrument i cili është i sforcuar, Komisioni i Venecias, është i vetmi instrument ku mund ti drejtohemi një arbitri.

Endri Xhafo: A ka të drejtë presidenti kur thotë se ditën që mazhoranca kishte thirrur Komisionin e Venecias, miratuan ligjin për anëtarët e gjykatës kushtetuese

Astrit Patozi: Po ka shumë të drejtë në këtë pikë.  Sepse ishte një kapëqrcim dhe ekzagjerim i maxzhorancës por nga ana tjetër  kjo nuk të jep të drejtën të thërrasësh popullin që ta vendosë por duhet ti drejtohesh përsëri Komisionit të Venecias të thotë fjalën. As presidenti nuk po pret Venecian. Ilir Meta abuzon kur thotë se u nxeh me faktin se mazhorana i bëri pabesi Komisionit të Venecias dhe ndaj thirri popullin, ndërkohë që gënjen. Pse gënjen? Sepse popullin e kishte thirrur në 8 dhjetor, të njëjtin popull kur kjo nuk kishte ndodhur. Por edhe sikur të kishte ndodhur përpara 8 dhjetorit përsëri duhet ta vendoste Komisioni i Venecias se kush kishte të drejtë mes dy institucioneve. Pra as gruaja e Bilalit dhe as Vojo amerikani.

Endri Xhafo: Ismail Kadare në veprat e tij ka një shprehje që thotë; kërkimi i tepruar i së drejtës mund të cojë në padrejtësi. A e ka tepruar Presidenti me përdorimin e retorikës politike dhe sidomos me kërcënimin për të shkrirë parlamentin?

Astrit Patozi: E gjitha është betejë politike dhe asgjë juridike. Cdo gjë që thuhet është hipokrizi. Edhe flamuri i mbrojtjes së Kushtetutrës edhe të tjera janë sllogane, që përdoren për të fshehur një fakt tjetër, që kjo është një betejë për territor që bëhet mes dy gjelavë të politikës. Ilir Metës i rri ngushtë kostumi i presidentit, do të dalë nga kafazi ku e ka futur Edi rama me vullnetin e tij, dhe trhërret popullin. Si mund të thirret nga një bir i rilindjes si produkt politik. Ilir Meta përfaqëson sot, një pakicë shqiptarësh atë që ka votuar LSI-në që ai udhëhoqi në fushatën e 2017. Për mua shkelje më e rëndë e kushtetutese është që presidenti  i zgjedhur të udhëheqi fushatën e një partie politike, ndërkohë që duhet të përfaqësojë unitetin e popullit. A ishte gjëmë e madhe ajo që bëri presidenti në 2017? Jo, sepse edhe të tjerët e kishin shkelur kushtetutën apo kodin zgjedhor me atë marrëveshjen e pisët të 17 majit. Pra presidenti në një farë mënyre u fut në një terren shkeljesh ligjore pas një pazari të ulët politik që ndodhi mes Lulzim Bashës dhe Edi Ramës. Shqipërinë nuk mund ta marrin zvarrë tre persona që ti bëjnë edhe 1 prillin, edhe 21 janarin, dhe 17 majin, herë fshihen pas flamurit amerikan herë pas shqiptar.

Endri Xhafo: Ju thoni se është politike, që Ilir Meta të mos shkarkohet, apo politike në perspektivën kur Ilir Meta të mos jetë më president i të republikës.

Astrit Patozi: Është një lloj presioni, që ilir Meta të mbajë kuotat politike apo ti rrisi ato përballë Edi Ramës duke patur parasysh një fuqizim të mëtejshëm të Edi Ramës si kryeministër. Ky është meraku i tij, besoj që Ilir Meta e ndjen se Edi Ramës nuk i intereson ta shkarkojë. Meta do të qëndrojë me sa duket se është betuar që deri në 22 korrik 2022 do të qëndrojë, do të mbrojë flamurin amerikan dhe shqiptar, këtë detyrë i ka caktuar vetes. Nëse kjo marrëveshje mund të prishet, atë mund ta prishë Ilir Meta. Edi Ramës i intereson një presidnet i delegjitimuar, i telendisur. Sot qeveria po e përdsor presidentin si pengesë. Vetë Ilir Meta a ka ndërmend ta shkarkojë parlamentin?

Endri Xhafo: Vetë Ilir Meta ka ndërmend ta shkarkojë parlamentin?

Astrit Patozi: Nuk ka të drejtë ta bëjë. Nëse ai premton se do e shkarkojë parlamentin le ta bëjë, do të dëshiroja ta bënte.

Endri Xhafo: Pse nuk do e bëjë?

Astrit Patozi: Nuk do e bëj sepse e di që nuk do merrej parasysh dhe do i hidhej në kosh të plehrave,  siç i ndodhi me dekretin e 13 tetorit. Ilir Meta nuk e ka shumë qejf tja përmendësh dekretin e 13 tetorit që nuk u përfill, edhe një mospërfillje tjetër si fisheku i fundit….

Endri Xhafo: Ai ka dhënë fjëln…

Astrit Patozi: Fjala nuk ka shumë vlerë në Shëqipëri, sepse po të kishte vlerë të gjithë këta që kanë lëvizur gurët e shahut politik në shqipëri, nuk do e bënim këtë debat. Presidenti bëri një letër sot, drejtuar komisionit të zgjerimit të Europës që shqipëria të parnohet por pastaj i jep një mijë arsye që të mos pranohet, kjo është qesharake./abcnews.al

78.png
in a17:52 | 05/03/2020

I ftuar në “ABC News” kreu i Partisë Bindja Demokratike, Astrit Patozi përballë gazetarit Endri Xhafo ka folur letrën e Presidentit Meta dërguar Brukselit për të ndërhyrë, pasi sipas tij mazhoranca po thellon krizën duke synuar kapjen e Kushtetutës.

“Ilir Meta ka treguar se kur ka zi hesht, ndërsa kur ka dasëm merr çiften dhe nuk mund të gëzojë njeri”, tha Patozi.

Por Patozi theksoi se ka një problem pasi nuk po dëgjohet një palë e tretë. Gjykata Kushtetuese është një koncept që kuptohet nga 1 mijë veta në Shqipëri, u shpreh ai.

A ka një mafia ndërkombëtare e cila synon ose mban një krah të caktuar politik?

Patozi: Kjo është pjesa më e errët e lëvizjes politike të Ilir Metës, i cili duhet ta shpjegojë. Ashtu siç jep emrat e puçistëve, të cilët i  njohim me emra, kur thotë mafia ndërkombëtarë ka parasysh SHBA-të, të cilët i sheh në trajtën e ambasadorëve. Duhet ta ndajë mendjen, të thotë kush janë mafia ndërkombëtare, kush janë qeveritë. Të tregojë armikun.

I pyetur nga gazetari Endri Xhafo se a ka faktori ndërkombëtar një preferencë politike në Shqipëri, Patozi theksoi se ndërkombëtarët kanë pasur gjithmonë tendencën të jenë pranë qeverive.

Patozi: Kanë pasur gjithmonë tendencën për të qenë më afër qeverive.

Në rast se akuzat e Metës do ishin të qarta do të kishin ndërhyrë vetë. Fakti që nuk ka, do të thotë se situata nuk është kaq e rëndë.

Përse ndërkombëtarët nuk folën një fjalë për kanabizim e vendit, përse heshtin ndaj kapjes së drejtësisë nga Edi Rama?

Patozi: Ne harrojmë që nuk jemi ne ata që vlerësojmë partnerët perëndimorë, janë ata që na vlerësojnë, sepse ne duam të shkojmë drejt tyre. Ata midis disa projekteve zgjedhin më të madhin. Më i madh projekt i tyre, është Reforma ne Drejtësi. Çdo kundërshtar nuk është i mirëpritur, ndaj disa forca politike janë më pak afër tyre dhe disa janë më afër.

“OFL dhe anti KÇK”

Patozi: OFL nuk është argument, është më shumë hall i brendshëm. Nuk është shenjë force, qeveria e Ramës ka qenë e pafuqishme të luftojë krimin dhe kërkon ta bëjë me një fushatë 6 mujore. OFL sot është harruar sepse diskuton betejën e pisët personale.

Basha është i dënuar ta ndjekë pas Ilir Metën?

Patozi: Jo. Madje është e kundërta, është ai i dënuar të ndjekë Lulzim Bashën. Kjo që po ndodh është paradoksale. Basha me gjysëm zëri dha një prononcim për protestën. Nuk kishte pse te shprehej se do merrte pjesë si qytetar, por duhet të shkonte si politikan, sepse aksioni i tij politik shkon në të njëjtën linjë me PD.

Nëse Meta i ka kauzat e vërteta nuk ka nevojë të dalë në shesh, nuk ka pse i merr opozitës të vetmin instrument që ka, thirrjen e njerëzve në shesh. Basha duhet të jetë ai që udhëheq, por opozita nuk bëhet më e fortë dhe e djatha nuk mund ta gjejë veten me udhëheqës Metën./abcnews.al

patozi-1.jpg
nev ila18:27 | 03/03/2020

Ka një ekzaltim të madh të atyre që organizuan apo udhëhoqën mitingun e Ilir Metës dje në bulevard. Aq i madh ishte shfrimi i gëzimit, sa krijoi edhe përplasje të forta shifrash për pjesëmarrjen, siç ishte, fjala vjen, kontrasti mes 100 mijë qytetarëve, që kishte numuruar Nikoll Lesi me 500 mijë vetët e Sali Berishës.

Por tek e fundit, numrat nuk kanë shumë rëndësi që një manifestim politik të konsiderohet i suksesshëm. Nëse ata që iu përgjigjen thirrjes së Presidentit për të mbrojtur në shesh kushtetutën janë ndjerë fitues, pasi u dha komanda shpërndahu, gjithçka ia ka vlejtur dhe është i kotë çdo debat tjetër.

Problemi është se shumica prej tyre, natyrisht jo të gjithë, kur kanë marrë rrugën për në shtëpi u janë rikthyer sërish halleve të veta, që nisin me papunësinë e nuk dihet se ku mbarojnë.

Pjesa dërrmuese e asaj turme ka 7 apo më shumë vjet që e plugon bulevardin “Dëshmorët e Kombit” dhe pas çdo mitingu dëgjon udhëheqësin nga foltorja që bërtet për një fitore të madhe, pasi e ka copëtuar pa mëshirë dhe pastaj rrëzuar me fjalë armikun e kombit, ndërkohë që ky i fundit e sheh rënien e vet gjithmonë live në televizor.

Nuk janë të paktë ata, që u ka takuar të kenë të dalë në protesta më shumë kundër heronjve të sotëm, të cilët dikur kanë qenë kundërshtarë të egër, se sa kundër armikut, që u ka shkelur këto ditë kushtetutën e presidentit. Por edhe kjo nuk ka shumë vlerë në një kohë, kur i shpallur luftë çdo gjëje racionale, që ka tepruar pa u vrarë dhe likujduar në këtë vend.

Nga ana tjetër ka një përpjekje të sforcuar për ta delegjitimuar dhe për ta injoruar protestën, sikur jetojmë në një vend që po qeveriset mirë nga Edi Rama, por janë disa të llastuar, të cilët nuk kënaqen asnjëherë edhe botën po t’u falësh.

Ndërkohë që kjo qeveri e ka bërë baltë, aq shumë në këto 7 vjet, sa që duhet të ishte larguar shumë kohë përpara se Ilir Meta të zbulonte këto shkeljet e kushtetutës së vet. Madje, edhe në rast se do të mërzitet ndonjë udhëheqës i Partisë Demokratike, mund ta themi se ajo e ka merituar të largohet që gjatë kohës kur qeveriste në koalicion me LSI-në e tij, jo shumë larg, por vetëm 2 vjet e ca më parë.

Sot ata ndjehen të qetë nga pafuqia e revlucionit, që i është lagur baruti, por po ta shihnin si kërcënim protestën në bulevard dhe betimet e presidentit, edhe ata me siguri do të thërrisnin popullin e tyre në bulevard.

Për t’i treguar dhëmbët dhe muskujt deri në fund armikut të palës tjetër, të cilin në raste të tjera e kanë pasur në krah si bashkëluftëtar. Dhe do të fillonte pastaj ai debati i neveritshëm me shifrat, që nuk kuptohet se pse vazhdon prej gati 30 vjetësh në këtë vend, kur të gjithë e dinë se i vetmi numurim që ka vlerë janë zgjedhjet.

Por, gjithësesi, në rast se ata që dolën dje në bulevard janë të lumtur me faktin që disa herë në vit bëhet dikush sebep që i bën bashkë në një miting kundër qeverisë dhe pastaj asgjë nuk ndryshon, diskutimi nuk ka asnjë vlerë. Sepse normalisht ai duhet të zhvillohet me ata që nuk e pranojnë këtë ritual të mërzitshëm dhe poshtërues, edhe pse mund të mos kenë qenë dje në protestë.

E vërteta është se Shqipëria normale nuk ishte dje në “manifestimin” e Ilir Metës, por ajo nuk ka asnjë lidhje edhe me qeverinë e korruptuar dhe zullumqare të Edi Ramës. Ajo është e lodhur dhe e cfilitur nga betejat e paprincipta të 3-4 mëkatarëve përsëritës dhe nga aleancat e tyre të neveritshme, në gjithë këto vite, që po e bëjnë të pajetueshëm këtë vend.

Ajo është sot shumica e papërfaqësuar, të cilën nuk e llogarisin, sepse nuk mund ta numërojmë dot, as si dëgë mimoze që tundet në protestën e Ilir Metës dhe as si like facebook-u në postimet bajate dhe patetike të Edi Ramës.

30 vjet janë shumë që të shikosh të njëjtët personazhe, nganjëherë edhe të ricikluar, që të tundin para fytyrës flamujtë e rreckosur dhe të njollosur keq nga korrupsioni dhe abuzimet e rënda me pushtetin të një morali, që nuk ekziston më.

Është, në fakt, pikërisht ajo Shqipëri që e dëshiron dhe e meriton më shumë se kushdo tjetër ndryshimin. Por që ai të vijë, duhet që ajo të zgjohet dhe të marrë përgjegjësi. Pa pasur nevojë që të jetë ushtare në betejat apo kauzat e rreme të atyre, që gënjejnë duke u fshehur pas kushtetutës dhe himnit të kombit.

Ndryshe, fatin e të vetmes Shqipëri që kemi do ta vendosin ekskluzivisht banorët e bulevardit, pavarësisht flamurit, degës së pemës që mbajnë në duar apo dhe të emrit të udhëheqësit, që i fton gjithmonë për “shpëtuar atdheun”. Madje nuk është çudi që të njëjtët njerëz, herë të parakalojnë si fitimtarë dhe, herë të protestojnë si të mundur në bulevard./abcnews.al

astrit-patozii.jpg
ger ta20:52 | 28/02/2020

Kreu i Bindjes Demokratike, Astrit Patozi ka komentuar paralajmërimin e Ambasadës Amerikane për qytetarët e saj që të rrinë larg protestës së organizuar nga Presidenti Ilir Meta. Patozi ka komentuar po ashtu edhe edhe reagimin e kreut të shtetit, që tha se nuk ka vend për alarm.

Sipas tij të dy palët kanë të drejtë. Siç thekson Patozi edhe amabasada ka të drejtë ku paralajëmron qytetarët e sajt që të qëndrojnë larg protestës, por edhe Presidenti ka të drejtë kur premton se nuk do të ndodhë asgjë e keqe.

Komenti i Astrit Patozit:

TË DY PALËT KANË TË DREJTË

Ambasada Amerikane ka shumë të drejtë, kur paralajmëron qytetarët e vet që të qëndrojnë larg protestës së thirrur nga Presidenti, sepse ka parasysh Ilir Metën.

Por edhe Ilir Meta ka shumë të drejtë, kur premton se më 2 mars në Tiranë nuk do të ndodhë asgjë e keqe, sepse ka parasysh amerikanë

astrit-patozi-byro.jpg
nev ila20:21 | 17/02/2020

Koordinatori i partisë Bindja Demokratike, Astrit Patozi, ka reaguar pas përfundimit të konferencës së donatorëve, ku Shqipëria mblodhi 1.15 miliard euro fonde për procesin e rindërtimit.

Përmes një njoftimi në rrjetet sociale Patozi e përshkruan një ditë të bekuar dhe se tashmë të prekurit nga tërmeti mund të marrin frymë lirisht sepse vendet e Bashkimit Europian nuk e lanë vetëm Shqipërinë.

Gjatë shkrimit të tij, Patozi thotë se qeveria të kursejë krekosjet dhe mburrjet për një meritë që nuk është e saj. Patozi gjithashtu shkruan se  qeveri duhe t ëpërveshë mëngët për rindërtimin dhe të heqë dorë nga veset famëkeqe duke u fokusuar tek transparenca e parave, si i vetmi ‘kërcënim’ për të prishur këtë mrekulli, që prodhoi sot Brukseli.

Reagimi i plotë:

“TI NUK DO TË JESH KURRË VETËM”, SEPSE SHQIPËRINË NUK E LANË VETËM

(Edhe solidariteti mes popujve qenka po aq i paparashikueshëm sa tërmetet)

Sot është një ditë e bekuar për të kuptuar se ëndrra e shqiptarëve për Europën shkon përtej slloganeve të lodhura politike për integrimin. Dhe se vetë ai proces nuk ka parasysh një vizë më pak apo më shumë në pasaportat tona.

Por mbi të gjitha për t’u bindur se anëtarësimi në BE nuk është qëllim në vetvete dhe kurrësesi stacioni i fundit në rrugëtimin politik të shqiptarëve përkrah popujve të tjerë.

Mirënjohje për çdo cent të bujarisë së çdo vendi, që vendosi të ndajë “kafshatën” e vet me Shqipërinë e traumatizuar dhe kërrusur nga tragjedia e tërmetit rrënues të 26 nëntorit.

Më shumë se vlera e pabesueshme e ndihmës së mbledhur në Konferencën e Donatorëve, plotësisht e mjaftueshme për rindërtimin e plotë, ka rëndësi shprehja e shkëlqyer e solidaritetit ndërkombëtar për fatkeqësinë tonë!

Gjithçka ishte fantastike! Falë miqve jo vetëm europianë të Shqipërisë, që u përgjigjën sot në Bruksel, ka realisht kuptim deviza e huazuar nga himni i klubit të Liverpulit. Vetëm sot të dëmtuarit nga tërmeti mund të marrrin frymë të lehtësuar. Ata “nuk do të jenë asnjëherë vetëm”, sepse Shqipërinë miqtë nuk e lanë vetëm të vuante hallin e saj.

Sepse në rast se kjo nuk do të ndodhte, fatura e madhe e tërmetit do të ishte një kosto e papërballueshme, që do t’i mbivihej pamëshirshëm mbi shpinë dështimeve të qeverisë.

Natyrisht, në dëm të atyre që u prekën nga tërmeti, në radhë të parë, dhe tërthorazi pastaj të gjithë qytetarëve të këtij vendi. Dhe këtë nuk mund ta dinte as edhe europianisti më i thekur në Shqipëri dhe jashtë saj. Sepse shfaqje të tilla pozitiviteti janë po aq të paparashikueshme sa edhe vetë tërmetet.

Sot është një ditë kur duhet të anashkalohen të gjitha të këqijat, edhe sepse e ka brenda përgjigjen e merituar për “sovranistët” e lodhur të Tiranës, që për interesat meskine dhe llogaritë e tyre të prishura e vënë herë pas here në dyshim raportin tonë me partnerët perëndimorë. Do të mjaftonte ajo që ndodhi sot në Bruksel për t’i refuzuar dhe mëshiruar ata.

Dhe në fund fare, qeveria do të bënte mirë që të na i kursente krekosjet dhe mburrjet për një meritë që nuk është e saj. Ajo duhet të përveshë mëngët kokëulur dhe të nisë pa humbur kohë rindërtimin, duke shmangur standartet dhe veset e veta famëkeqe me fondet publike, por mbi ta gjitha, duke u fokusuar tek transparenca. Sepse praktikisht është i vetmi kërcënim për ta shkatërruar apo prishur këtë mrekulli, që prodhoi sot Brukseli për Shqipërinë”, shkruan Patozi./abcnews.al

pp.jpg
in a14:13 | 08/02/2020

Kreu i partisë “Bindja Demokratike”, Astrit Patozi operacionet e realizuara nga “Anti KÇK” i ka cilësuar si filma me metrazh të shkurtër.  Përmes një postimi në “Facebook” ai thekson se duhet marrë me qetësi ky vit, ndërsa shkruan: “Nga njëra anë do të gjëmojnë daullet e rindërtimit prej tërmetit dhe topat e luftës me KÇK-në, ndërsa nga ana tjetër do të bombardoheni me filma me metrazh të shkurtër, videoklipe, por sidomos me premtime për zgjedhje të parakohshme, të cilat janë gjithmonë te pragu i derës, që vetëm në çastin e fundit nuk hapet”.

Statusi: 

DUHET MARRË ME QETËSI KY VIT…

Duhet marrë me qetësi ky vit, se është shumë shpejt për t’u mërzitur. Për ata që gënjehen lehtë është e sigurt se do të jetë i mbushur me ngjarje dhe dukuri të rralla dhe të jashtëzakonshme.
Nga njëra anë do të gjëmojnë daullet e rindërtimit prej tërmetit dhe topat e luftës me KÇK-në, ndërsa nga ana tjetër do të bombardoheni me filma me metrazh të shkurtër, videoklipe, por sidomos me premtime për zgjedhje të parakohshme, të cilat janë gjithmonë te pragu i derës, që vetëm në çastin e fundit nuk hapet.
Madje edhe bandat do të bëjnë sikur janë trembur dhe janë strukur nga kjo goditje e pamëshirshme e shtetit prej kartoni, sepse edhe ato e dinë se fushatat mbarojnë shpejt.
Dalëngadalë do të harrohen arsyet që sollën atë paqe të papritur dhe mbi të gjitha kushtet e shenjta të Bundestagut, që dy javë më parë shërbenin si flamur për të udhëhequr tufat e armiqve të qeverisë.
Të gjithë janë në rolin e tyre për të na marrë vëmendjen që të mos kuptohet se i vetmi vendim që kanë marrë është mosndryshimi i statuskuosë. Sikur e kam para syve 15 marsin e kuartetit të famshëm të Këshillit Politik, që do të prodhojë asgjënë e parë. Dhe pastaj do të kërkohet të blihet një kohë tjetër, e kështu me radhë deri në fund.
Dalëngadalë do të biem në vitin tjetër me të njëjtat halle dhe me të njëjtët cuba, që i hakërrehen njëri-tjetrit, për faje dhe krime të përbashkëta, gjithmonë duke u ankuar se për të ndryshuar diçka në rendin e punëve në Shqipëri nuk ka asnjëherë kohë.

Fotografia e Astrit Patozi

Fotografia e Astrit Patozi

/abcnews.al

astrit-patozi.jpg
ger ta16:45 | 04/02/2020

Astrit Patozi ka komentuar operacionin “Forca e Ligjit”, i njohur si paketa “Anti-KÇK”, që ka nisur prej ditës së djeshme për të goditur krimin e organizuar.

Patozi shprehet se nuk ka pritshmëri pozitive për aplikimin e Anti-KÇK-së në Shqipëri.

Ndaj edhe nuk kam shumë shpresë që Edi Rama, edhe sikur ta kishte seriozisht këtë që po predikon, mund të mbyllë në vetëm 10 muaj një gropë të zezë, që është hapur para syve tanë për shumë vite me radhë edhe me bekimin e tij”, shprehet ai ndër të tjera.

Mesazhi i plotë:

Për xhelatët dhe viktimat e rreme të anti-KÇK-së

Kundërshtarët më të zëshëm të Anti-KÇK-së bëjnë gabim që e sulmojnë ligjin thjesht si një cënim i lirive dhe të drejtave të njeriut apo si një kapërcim të kushtetutës. Jo se nuk kanë të drejtë, sepse shkeljet janë ulëritëse, por kjo nuk ndodh për herë të parë në Shqipëri, që të bënte ndonjë përshtypje kaq të thellë

Të mos harrojmë që devijime po kaq të forta të kushtetutës kanë qenë edhe dekriminalizimi i famshëm, madje edhe vetë e shumëdebatuara reformë në drejtësi. Ndërkohë që dihet botërisht, se për dekriminalizmin opozita ka pasur eksluzivitet të plotë, ndërsa për reformën në drejtësi parlamenti shqiptar ka gjetur konsensusin më të gjerë në historinë e vet, duke votuar me unanimitet.

Në këtë kuptim, besueshmëria e argumentit të tyre bie, sepse niset nga premisa jorealiste. Kur, në fakt, problemi më i rëndësishëm i kësaj që po ndodh është, jo përgjegjësia për të marrë përsipër një ligj të jashtëzakonshëm, por përgjegjësia për gjendjen katastrofike të kriminalitetit në vend. E cila nuk ka ardhur në një ditë, që të trajtohet si korona virusi, i cili na kapi në befasi, por ne do ta mundim deri në fund të vitit, pasi të kemi shpikur edhe vaksinën.

Të njëjtin gabim bëjnë edhe të tjerët, të cilët pasi e masakrojnë me gjithë fuqinë propagandës së vet ligjin, si një rrezik të madh për vendin, nisin pastaj e hartojnë lista delinkuentësh politikë, që,sipas tyre, duhet të jenë subjektet e para të Anti-KÇK-së. Dhe kjo është mënyra më e mirë për ta legjitimuar ligjin, sepse duket sikur i vetmi problem është se kush e kontrollon qeverinë.

Nëse do realisht që ta shtrish goditjen edhe tek të kapurit e politikës, nuk mund ta bësh duke përzgjedhur banditët e kudërshtarit, sepse pastaj i bie që ai duhet të caktojë se kush janë të tutë. Ka një mënyrë fare të thjeshtë për të fituar pikë në publik, mjafton që të propozosh shtrirjen e efekteve të ligjeve të jashtëzakonshme edhe për zyrtarët dhe ish-zyrtarët e lartë të shtetit, njësoj siç veprohet me prokurorët, gjyqtarët, policët dhe tani së fundi edhe me bosët e krimit të organizuar.

Ndërkaq, askush nuk po e thotë se përse është nevoja për kaq shumë ligje të posaçme në një vend që problemin më të madh ka moszbatimin e ligjeve normale. Të cilat janë shumë më të thjeshta dhe më të lehta për t’u respektuar, ngaqë nuk para kanë kundërshtarë. Dhe dëshmi më spektakolare për dështimin e një qeverie vështirë se mund të gjendet.

Unë nuk kam ndonjë pritshmëri pozitive për aplikimin e Anti-KÇK-së në Shqipëri. Jo se nuk besoj tek aftësia e organeve tona ligjzbatuese, por ngaqë nuk e pranoj dot qeverisjen me fushata, e cila sot po e trajton fuqizimin e krimit të organizuar si një emergjencë kombëtare, a thua se bandat dhe mafiozët e rrezikshëm me pasuri marramëndëse na i hodhën me parashutë ditët e fundit.

Ndërkohë që ata kanë qenë këtu, duke u forcuar dita-ditës, dhe duke na bërë karshillëk me luksin dhe fuqinë e shtuar të parave të drogës dhe trafiqeve, në jo pak raste edhe në aleancë të hapur me qarqet më të larta të politikës. Ndaj edhe nuk kam shumë shpresë që Edi Rama, edhe sikur ta kishte seriozisht këtë që po predikon, mund të mbyllë në vetëm 10 muaj një gropë të zezë, që është hapur para syve tanë për shumë vite me radhë edhe me bekimin e tij.

Është njësoj si të lësh minjtë të ushqehen me bollëk e të shëndoshen për një kohë të gjatë, e pastaj t’u lëshosh për t’i kapur mace të pangrëna dhe kockë e lëkurë, të cilat edhe në trup janë sa gjysma e tyre.

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono