Pas akuzave të Partisë Demokratike e cila reagoi zyrtarisht për arrestimin e botuesit Henri Çili, dhe tha se policia nuk bëri transparente operacionin, dhe nuk tregoi zyrtarin e lartë të drejtësisë, me të cilin ka biseduar botuesi, ka reaguar kandidati për në Gjykatën e Lartë Sokol Sadushi.
Sadushi ka mohuar kategorikisht të ketë pasur komunikim me botuesin Henri Çili dhe aq më tepër të ketë zhvilluar biseda për çështje të tilla penale.
Gjithashtu Sadushi thekson se në rrethanat kur çështja është me interes të madh publik është e volitshme që prokuroria të sqarojë opinionin publik mbi detajet e këtij takimi.
PD akuzoi se aktualisht në sistemin e drejtësisë janë vetëm dy persona që kanë lidhje me Gjykatën e Lartë, Ardian Dvorani dhe Sokol Sadushi.
Deklarata e Plotë për median:
“Deklaratë për media
Duke marrë shkas nga përmendja e emrit tim në deklarime politike të bëra këto ditë nëpërmjet medias, ndihem i obliguar të informoj opinionin publik dhe mediatik se:
Çdo pyetje retorike e shtruar këto ditë, nëpërmjet deklarimeve politike, mediatike dhe që vë në dyshim integritetin moral e profesional, duket se ka për qëllim të dëmtojë personalitetin tim, pikërisht në këtë moment që lidhet me procedurën e nisur për kandidimin si gjyqtar i Kolegjit Administrativ në Gjykatën e Lartë.
Deklaroj me përgjegjësinë time të plotë se, me Z. Henri Çili prej shumë kohësh nuk kam pasur asnjë komunikim të drejtpërdrejtë apo të tërthortë, në ambiente publike apo private, për asnjë çështje, përfshirë ato që implikojnë personalitetin tim dhe, për më tepër, që lidhen me çështje gjyqësore penale.
Çdo deklarim i bërë ndaj personit tim mbi këtë ngjarje nuk përputhet me të vërtetën, sikurse jam i bindur se do të rezultojë në përfundim të procesit penal.
Në rrethana të tilla, kur çështja dukshëm është me interes publik, sugjeroj se nëse është i vërtetë fakti mbi takimin e realizuar me “një funksionar të lartë të drejtësisë“, do të ishte me vend që organi i prokurorisë të sqarojë opinionin publik mbi detajet e këtij takimi.
Informimi i opinionit publik i shërben, gjithashtu, ruajtjes dhe forcimit të autoritetit të pushtetit gjyqësor dhe forcon klimën e besimit në organet që ushtrojnë ndjekjen penale.
Sokol SADUSHI, Tiranë, më 3.03.2020″, shkruan Sadushi. /abcnews.al
