Mungesë humori, mbyllje në vetëvete e deri çrregullime të ankthit po manifestojnë shumë fëmijë pas pandemisë së Covid. Sipas Organizatës Botërore të Shëndetësisë që analizoi sjelljen e fëmijëve në moshë shkollore në 17 shtete të Europës përfshirë dhe Shqipërinë rreth 1 në 5 fëmijë raportuan se shpesh ndjehen të trishtuar ndërsa 1 në 4 të vetmuar.
“Kemi dhe një fluks të fëmijëve, të rritjes së rasteve me fëmijë të cilët manifestojnë humor të rënë, mbyllje në vetëvete, çrregullime të ankthit qe janë vënë re dhe këto të rriten pas periudhës së pandemisë ndoshta për shkak të izolimit dhe përiudhën e vështirë që kaluam. I bëj thirrje prindërve ti shohin si sillen, fëmijët kuptohen më shpejt, reflektojnë kur kanë reagim ndaj një situate traumatike, ti adresojnë tek mjeku”
Mjekët flasin dhe për shtim të të rriturve që vuajnë nga çrregullime të shëndetit mendor. Ndonëse probleme të tilla mbeten ende tabu në qendrat komunitare në Tiranë psikiatrit thonë se në këtë periudhë po përballen me një situatë të vështirë.
“Është shtuar numri i rasteve të reja, por kemi dhe situata të agravuara nga ata të cilët trajtohen, kryesisht pacientët kronikë. Kjo është një periudhë e vështirë për ne pasi kemi vënë re se tentojnë të ndërpresin mjekimin e duke ndërprerë mjekimin sigurisht që situatat agravojnë duke u shoqëruar me sjellje agresive si në familje dhe në komunitet. … Pacientët vuajnë dhe hezitojnë të kërkojnë ndihmë, se hezitojnë të marrin mjekim… frika se mos bëhen të varur bën shumë njerëz të vuajnë pasojat e ankthit “
Në muajin e ndërgjegjësimit për çrregullimet e shëndetit mendor mjekët apelojnë për të shmangur stigmën dhe për të kërkuar ndihmë që problemi shëndetësor mos t’ju cënojë cilësinë e jetës.
