Mosha mesatare e personave që kanë humbur jetën nga koronavirusi në Itali është 81 vjeç, dhe më shumë se gjysma e viktimave kanë vuajtur nga 2 ose 3 sëmundje të tjera.
Këto janë të dhënat publikuara nga Instituti i Lartë i Shëndetësisë në Itali. Këto të dhëna janë thuajse të njëjta me ato të gjetura më herët në Kinë, ku edhe filloi kriza e koronavirusit.
Më shumë se gjysma e personave që kanë vdekur në Itali janë mbi moshën 80 vjeç.
Raporti ka marrë në studim 73 persona që humbën jetën në Lombardi, 21 në Emilia Romagna, 7 në Veneto dhe 3 në rajonin e Marche dhe bazohet në të dhënat e nxjerra duke plotësuar një pyetësor të zhvilluar posaçërisht me qëllim zbulimin e rasteve të vdekjes.
42,2 për qind e vdekjeve i përkasin grupmoshave midis 80 dhe 89 vjeç, ndërsa 32.4 për qind ishin midis 70 dhe 79, 8.4 për qind midis 60 dhe 69, 2.8 për qind midis 50 dhe 59 dhe 14.1 për qind mbi 90 vjet.
Gratë që kanë vdekur nga virusi janë në moshë më të madhe se burrat. Gratë me moshë mesatare 83.4, ndërsa burra me moshë mesatare 79.9 vjeç.
Hipertensioni, sëmundja e zemrës dhe diabeti janë patologjitë më të zakonshme
15.5 për qind e personave që kanë vdekur kishin zero ose një sëmundje, 18.3 për qind kishin 2 sëmundje dhe 67.2 për qind kishin 3 ose më shumë sëmundje. Patologjia më e përsëritur është hipertensioni (i pranishëm në 74.6% të viktimave), i ndjekur nga sëmundja ishemike të zemrës (70.4%) dhe diabeti (33.8%).
Koha mesatare nga fillimi i simptomave deri në shtrimin në spital ishte 5 ditë dhe koha mesatare mes shtrimit në spital dhe vdekjes ishte 4 ditë.
