E ftuar në emision “Thumb”, aktorja e cila tashmë është parë edhe në rolin e moderatores Rudina Dembacaj, u është përgjigjur pyetjeve “helmuese” të Fatmës dhe Aulonës. Një ndër pyetjet që Rudina do preferonte të mos i ishte bërë nga moderatoret ishte ajo në lidhje me ish-kolegun e saj aktorin Agron Llakaj. Ajo u pyet nëse do ta ftonte Llakajn në emisionin e saj. Por përgjigja e saj ka qenë një “Jo” e madhe.
“Unë gjërat që kam brenda i nxjerr jashtë shumë kollaj. Unë nuk shkel mbi personalitetin tim sepse unë kam një kokë maloku. Edhe nëse do bëhej fjalë për miliona euro nuk do e ftoja. Nëse do bëhej fjalë për ndonjë bum suksesi që të rrija gjithë jetën time në Maldive ndoshta edhe do ta ftoja”, tha Rudina duke qeshur.
Më tej ajo ka folur për eksperiencën në rolin e moderatores ku është shprehur se nuk është ndjerë rehat në këtë puntatë të parë. Sipas saj kishte dalë nga vetja dhe këtu e kishte fjalën për veshjen, por edhe për mënyrën e prezantimit.
“Nuk është kollaj të dalësh nga një personazh në një tjetër. Është vetëm një sezon që kam hyrë në studion si prezantuese sepse tek makina unë kam qenë totalisht vetvetja. Këtë vit të ri kam ardhur me një ndryshim. Unë do heq dorë nga “pjeshkëlliku” sepse më bezdis shumë. Të gjithë ishin të idesë që unë të dilja edhe me fustan edhe me dekolte. Por mua nuk më rri ajo, sepse unë nuk jam vetja në të sjellur. Nuk më vijnë batutat natyrshëm. Këtë sezon unë do vij komplet ndryshe. Për shembull në puntatën e parë do të jem e veshur me kostum dhe atlete. Unë do jem vetvetja. Unë nuk kam lidhje fare me gazetarinë dhe e kam shumë të vështirë që të shpik pyetje dhe të krijoj lajm. Në marrëdhënie me të ftuarit nuk kam pasur shumë vështirësi. Unë nuk i ofroj dot të ftuarit që nuk kam shumë simpati për ta. Unë kam ftuar persona për të cilët nuk kam pasur simpati. Në të parën unë u ndjeva paragjykuese, por sërish nuk kisha kimi në intervistë”, tregoi Dembacaj./abcnews.al
