Me disa fjalë prekëse, kryedemokrati Lulzim Basha ka reaguar për herë të parë pas ndarjes nga jeta të babait të tij Xhelal Basha, të cilit i është dhënë sot lamtumira e fundit. Basha shprehet se largimi i tij i ka hidhëruar të gjithë në familje, por thekson se i ati është larguar në paqe, i rrethuar nga dashuria dhe përkujdesi i njerëzve të tij të dashur.
Kreu i PD falenderon miqtë, dashamirësit si dhe mjekët dhe infermierët që u kujdesën për të atij përgjatë gjithë kësaj periudhe të vështirë. Xhelal Basha ndërroi jetë në moshën 85-vjeçare, pas një beteje të gjatë me një sëmundje të rëndë.
“Sot i dhamë lamtumirën babait tim Xhelalit i cili u nda nga kjo jetë pas një beteje të gjatë, duke na hidhëruar dhe ligështuar mamanë time Remzijen, mua dhe vëllain tim Erlindin, Aurelën, vajzat, familjarët dhe miqtë e shumtë të tij dhe familjes. Ai u largua në paqe i rrethuar nga dashuria dhe përkujdesi i njerëzve të tij të dashur.
Në këto momente dhimbje të rëndë për familjen tonë, falenderojmë me mirënjohjen më të thellë të gjithë miqtë dhe dashamirët që na u gjendën dhe na lehtësuan, me praninë, mendimet, mesazhet, lutjet dhe mbështetjen e tyre. Falenderojmë mjekët, infermierët dhe të gjithë personelin shëndetësor për përkujdesjen e tyre të dhembshur për babain gjatë gjithë kësaj periudhe.
Për familjen tonë kjo është një humbje e madhe. Por po kaq i madh është ngushëllimi që Zoti e mori me qetësinë dhe dinjitetin që i fali në çdo çast të jetës së tij, si dhe lutjet tona që shpirti ti prehet në paqe!”, shkruan ai. m.v/Abcnews.al
