Loading ...
Kur janë numëruar diku gjysma e diku mbi gjysma e fletëvotimeve, në 19 komuna të Kosovës duket se kryetari është zgjedhur qysh sot, në raundin e parë të zgjedhjeve lokale, raporton Gazeta Express.
Nga rezultatet e deritashme të publikuara në webfaqen e Komisionit Qendror të Zgjedhjeve, Deçani, Kaçaniku, Mitrovica e Jugut, Leposaviqi, Lipjani, Novobërda, Obiliqi, Peja, Skënderaj, Shtërpca, Suhareka, Ferizaj, Zubin Potoku, Zveçani, Hani i Elezit, Graçanica, Ranillugu, Parteshi e Mitrovicë e Veriut do ta zgjidhin çështjen e kryetarit që sot.
Prej 19 komunave ku sipas rezultateve të deritashme nuk do të ketë balotazh, Lëvizja Vetëvendosje nuk fiton në asnjërën. Sipas këtyre rezultateve që tregojnë komunat ku s’pritet të ketë balotazh, PDK-ja prin nga partitë shqiptare. Ajo është e para në Ferizaj, Mitrovicë të Jugut, Skënderaj, Kaçanik e Han të Elezit.
LDK-ja, ndërkaq, sipas këtyre rezultateve, do të fitojë pa balotazh në Pejë e Lipjan, ndërsa AAK-ja në Deçan e Suharekë.
Në 9 komunat e tjera ku ka fitore pa balotazh, kanë fituar të gjithë kandidatët për kryetarë nga Lista Serbe./ Gazeta Ekspres
