Luhatjet e temperaturave gjatë 24 orëshit sjellin edhe komplikacione shëndetësore nga më të ndryshmet kryesisht tek grupmoshat e te vegjëlve. Mjekët pediatër bëjnë apel që prindërit të bëjnë kujdes me veshjet e fëmijëve, si dhe me përdorimin e antibiotikëve pa konsultë me specialistët.
Me ndryshimin e shpeshtë të temperaturave jemi të gjithë të riskuar të prekemi nga virozat, duke qenë se luhatjet e temperaturave nga mëngjesi deri në mbrëmje pësojnë luhatje të konsiderueshme. Sipas mjekëve grupmosha e bebeve 0-12 muajsh janë ata që kërkojnë kujdes më të veçantë.
Makbule Naipi, mjeke pediatre: “Temperaturat kanë luhatje me goxha gradë që pasohet me ndryshime në shumë fusha të shëndetit. Grupmosha më e prekur janë bebet mosha 0-12 muajsh. Imuniteti i tyre është ende i paformuar. Kanë problematikat e tyre që pasqyrohen me probleme në shëndet.”
Mjekja pediatre tregon edhe disa nga komplikacionet që ndodhin gjatë kësaj periudhe tek fëmijët.
“Problemet kryesore janë: infeksionet e rrugëve të sipërme respiratoreqë përfshijnë rrufën, një kollë të lehtë dhe më tëpër mbizotërojnë bronkiolitet. Ka dhe probleme në grupmosha të tjera që mund të lidhë edhe me ndryshimin e klimës por edhe me konsumimin e ushqimeve jo fort të përshtatshme.”
Me rëndësi për një shëndet të mire të fëmijëve sipas mjekes ka edhe temperatura e ambientit, veshja si dhe disa faktorë të tjerë.
“Këshilla ime e parë që unë insistoj fort është ambiente sa më të ajrosura jo të mbingohura dhe jo të mbyllura. Një veshje sa më komode, të mbizotërojë pambuku. Një kontakt i pandërprerë me mjekun e tyre të familjes për të marrë këshillat e duhura për mënyrën e ushqyerjes. Evitimi i ambienteve të mbyllura, lokaleve që frekuentohen sot. Nuk ua këshilloj këtë, pasi nuk është e shëndetshme për fëmijët.”
Mjekët i bëjnë apel prindërve që mos të marrin antibiotikë të ndryshëm pa konsultën e specialistëve, pasi kjo nuk ndihmon por e përkeqëson dhe më tej shëndetin e fëmijëve./abcnews.al
