“Ndërmjetësi” është goditja e radhës nga SPAK në radhët e zyrtarëve të korruptuar që është zhvendosur sot në Tiranë.
Policia ka dhënë detajet në lidhje me operacionin e finalizuar pasditen e sotme në Kadastrën e Tiranës, që ka çuar në pranga tre persona Gazmend Canaj, Neritan Bablusha dhe Admir Burrit me akuzën e ushtrimit të paligjshëm ndaj personave që ushtrojnë funksione publike. Ndërkohë nën hetim janë vendosur dy zyrtarë të tjerë, B.H, 59 vjeç dhe G.B, 58 vjeç.
Ndërkohë është pezulluar nga detyra Panol At-Nikolla, punonjës i Drejtorisë Vendore të ASHK i dyshuar për veprën penale “Korrupsion pasiv i personave që ushtrojne fuksione publike” . Në lidhje me këtë çështje është shpallur në kërkim I.A, për veprën penale “Korrupsioni aktiv i personave që ushtrojne fuksione publike” .
“Finalizohet operacioni policor i koduar “Ndërmjetësi” Operacioni nga Sektori për Hetimin e Krimit Ekonomik dhe Financiar në DVP Tiranë nën drejtimin e SPAK. Vihen në pranga 3 shtetas.
Seksioni për Hetimin e Korrupsionit në Drejtorinë Vendore të Policisë Tiranë, në bashkëpunim me Forcën Operacionale të Drejtorise Vendore të Policise Tiranë, nën drejtimin e Prokurorisë së Posaçme Kundër Korrupsionit dhe Krimit të Organizuar Tiranë, në kuadër të Procedimit Penal të vitit 2021, pas një punë intensive disa mujore, finalizoi me sukses operacionin policor “Ndërmjetësi”.
Në kuadër të operacionit u bë ekzekutimi i urdhërave të lëshuar nga Gjykata e Posaçme të Shkallës së Parë Kundër Korrupsionit dhe Krimit të Organizuar Tiranë, e cila ka caktuar masë sigurimi personal “Arrest në burg” ndaj shtetasve:
Gazmend Canaj, 49 vjeç, banues në Tiranë, i dyshuar për kryerjen e veprës penale “Ushtrimi i ndikimit te paligjshëm ndaj personave që ushtrojnë funksione publike”;
Admir Burri., 44 vjeç, banues në Tiranë, i dyshuar për kryerjen e veprës penale “Ushtrimi i ndikimit te paligjshëm ndaj personave që ushtrojnë funksione publike”;
Neritan Bablusha,52 vjeç, banues në Tiranë, i dyshuar për kryerjen e veprës penale “Ushtrimi i ndikimit te paligjshëm ndaj personave që ushtrojnë funksione publike”;
Po në kuadër të operacionit u bë ekzekutimi i masës se sigurimit personal me karakter shtrëngues “Detyrimi për t’u paraqitur në policinë gjyqesore” ndaj personave nën hetim:
B.H, 59 vjeç, lindur dhe banues në Tiranë, i dyshuar për kryerjen e veprës penale “Korrupsioni aktiv i personave që ushtrojne fuksione publike”;
G.B, 58 vjeç, banues në Tiranë, i dyshuar për kryerjen e veprës penale “Korrupsioni aktiv i personave që ushtrojne fuksione publike” .
Gjithashtu, u bë ekzekutimi i masës së sigurimit personal me karakter shtërngues “Pezullimi i ushtrimit të detyres apo shërbimit publik” ndaj personit nën hetim:
Panol At-Nikolla, 39 vjeç, banues në Tiranë, me detyre punonjes i Drejtorisë Vendore të ASHK Tirane Rurale 2, i dyshuar për kryerjen e veprës penale “Korrupsioni pasiv i personave që ushtrojne fuksione publike” .
Si dhe u bë shpallja në kërkim policor i shtetasit me iniciale “I.A”, për të cilin Gjykata ka vendosur caktimin e masës së sigurimit personal me karakter shtërngues “Detyrimi për t’u paraqitur në policine gjyqesore”, si i dyshuar për kryerjen e veprës penale “Korrupsioni aktiv i personave që ushtrojne fuksione publike” .
Materialet proçeduriale i‘u kaluan Prokurorisë së Posaçme Kundër Korrupsionit dhe Krimit të Organizuar Tiranë, në ngarkim të shtetaseve të sipërcituar, për veprat penale “Korrupsioni pasiv i personave që ushtrojne fuksione publike”, “Ushtrimi i ndikimit të paligjshëm ndaj personave që ushtrojnë fuksione publike”, “Korrupsioni aktiv i personave që ushtrojne fuksione publike”, njofton policia. m.v/abcnews.al
