Sezoni i fundit ishte i shkëlqyer për Andre Silvën. Sulmuesi portugez bëri shumë mirë me Eintracht Frankfurt, ekip me të cilin shënoi 29 gola.
Paraqitjet pozitive bindën Leipzig ta blinte për shumën e 23 milion eurove. Gjithsesi kjo nuk është fatura e plotë që gjermanët kanë paguar.
12 milion të tjera janë paguar komisione dhe këst në dorë për transferimin e sulmuesit, i cili përfaqësohet nga menaxheri Jorge Mendes.
25-vjeçari ka firmosur një kontratë 5-vjeçare me nënkampionët e Gjermanisë dhe ndihet entuziast për aventurën e re. “Po pres me padurim të filloj aventurën me Leipzig.
Klubi është ambicioz dhe ka objektiva të mëdha. Unë dua t’i ndihmoj për t’i arritur, veçanërisht me sa më shumë gola të jetë e mundur.
“Unë me të vërtetë dua të luaj në nivelin më të lartë, pra në Champions League. E kam mundësinë ta bëj këtë te Leipzig. Drejtuesit më bindën menjëherë me ambiciet që kanë dhe stilin e lojës që luan ky ekip.
Dua të falënderoj shumë Eintracht Frankfurt. Kalova dy vite fantastike dhe të suksesshme atje, jam rritur shumë“, theksoi lojtari i Portugalisë. /abcnews.al
