Nga Juxhin Mustafaraj
Kryesia e PD certifikoi mbrëmjen e të dielës 4 kandidatët për kreun e partisë, proces që do të mbahet të dielën e 13 qershorit. Lulzim Basha ka vendosur të rinis takimet e tij me strukturat, këtë herë me statusin e kandidatit në garë për një tjetër mandat 4 vjeçar në krye të PD.
Basha do të jetë pasditen e të hënës me strukturat e Partisë Demokratike në Berat ku do të kërkojë votën e anëtarësisë në 13 qershor dhe do të shpall ambicien për të sjellë PD në qeverisje pas 8 viteve në opozitë.
Rivalët e Lulzim Bashës në garën për kreun e PD, Fatbardh Kadilli dhe Edith Harxhi kanë kërkuar më shumë kohë për të qenë me demokratët dhe për të kërkuar votën e tyre përballë, Lulzim Bashës. Teksa kryedemokrati do të jetë në Berat, rivali i tij surprizë Agron Shehaj ka ftuar mediat në Hotel Rogner për të diskutuar mbi kandidaturën e tij.
Sipas udhëzimit të miratuar nga kryesia e Partisë Demokratike, fushata për katër kandidatët që synojnë të marrin drejtimin e PD kanë nisur zyrtarisht nga kjo e hënë dhe do të përfundojnë 24 orë përpara datës së zgjedhjeve të 13 qershorit. /abcnews.al
